Si Rama nalay wa masayod

Giangkon sa gitangtang nga mayor, Michael Rama, nga nainsulto siya dihang gipadad-an og demand letter sa City Legal Office nga nagmando pag-uli sa sakyanan sa syudad nga pabiling anaa sa iyang kustodiya.

Basi sa demand letter, si Rama dunay 24 oras aron iuli ang bulletproof Toyota Hiace Grandia nga nagsilbi niyang service vehicle.

Apan hangtod niadtong gahapon wala pamauli ang sakyanan.

Nagmagahi si Rama tungod kay alang niya nagpabilin siyang dunay katungod sa maong sakyanan isip pinili sa katawhan.

Dihang gipangutana sa media iuli ba niya ang sakyanan, igo ra ning mitubag nga "buhi pa ko" ug dayon lakaw paingon sa buhatan sa city legal officer nga si Atty. Santiago Ortiz, Jr.

Personal niya gipangutana si Ortiz kinsay nagsugo pagpadala sa demand letter.

Si Ortiz nangatarungan nga igo lang siya misunod sa mando ni Mayor Raymond Garcia.

Isip usa ka abogado, nagtuo kong nasayod si Rama sa implikasyon sa iyang gihimo.

Ang pagmagahi pag-uli sa sakyanan sa gobiyerno bisan wa na siyay katungod niini nagbutang kaniya sa peligro nga mag-atubang og laing kaso.

Gani mibahad na ang syudad nga ikiha siya og carnapping.

Way kapuslanan ang pag-insister nga buhi pa siya ug siya maoy pinili sa katawhan tungod kay wa may nilalis niya niini.

Tinuod bitaw nga buhi pa siya ug siyay pinili nga mayor sa miaging eleksiyon.

Apan dili sab matuis ang kamatuoran nga natangtang na siya sa pwesto human gikonbikto sa Ombudsman tungod sa nepotismo.

Laing di malalis nga kamatuoran mao nga giinstalar si Garcia sa DILG isip mayor hulip niya tungod sa iyang pagkataktak sa puwesto.

Hangtod nga makakuha si Rama og paborable nga hukom gikan sa Korte Suprema nga magbaliwa sa silot nga gipahamtang sa Ombudsman niya magpabilin ang kamatuoran nga dili na siya mayor ug nga way kapuslanan ang pag-insister tungod kay dili ni makatabang niya.

Mogawas lang siyang makaluluoy ug di maayo sa iyang imahin tungod kay murag siya nalay wa masayod nga di na siya mayor.

Angayan nalang siyang magpasalamat nga natugotan pa siyang makapapili tungod lay wala pa hingpit mapawong alang niya ang kahigayonan nga bawion ang iyang pwesto pinaagi sa tabang sa mga botante sa moabot nga midterm elections.

Ang moabot nga eleksiyon maoy angayang tutukan ni Rama inay sa mga butang nga wa na siyay dag-anan.