EDITORAL - Kasamok sa City Hall

Nabalik na gikan sa bakasyon si dismissed Cebu City mayor Michael Rama ug miinsister nga siya pagihapon ang lehitimong mayor sa dakbayan. Matud pa niya sa press conference kagahapon mobalik siya og asumir sa pagka-mayor sa siyudad.

Kini bisan pa og dunay hukom ang Ombudsman nga siya gi-dimiss sa serbisyo ug perpetual disqualification to hold public office.

Si Rama wala mabalaka kun posasan siya sa mga polis sama sa nahitabo sa iyang kanhi city administrator nga si Atty. Collin Rosell nga nibalik sa City Hall pipila ka semana na ang nakalabay ug miinsister sab nga napupos na iyang suspensyon ug mobalik na siya sa iyang trabaho. Gidakop si Rosell ug gikasohan.

Kun ang kampo ni Rama maoy paminawon, para nila dili pa hingpit ang desisyon nga dismissal ug perpetual disqualification. Mao sab kini ang gisandigan sa iyang mga dumadapig sama ni Rosell ug uban pa.

Hinuon, kun moinsister si Rama nga siya pa gihapoy mayor, iyaha sab na. Apan lahi na unya ang estorya kun iyahang buhaton ang gibuhat ni Rosell nga diha mismo sa City Hall nahitabo sa dihang nag-opisina kini bisan gitangtang na siya sa katungdanan.

Lain napud unyang komosyon ug pagkabalda sa serbisyo publiko ang gipaabot nga mahitabo diha sa City Hall sa mosunod nga mga adlaw, kun mobalik sa iyang opisina sa Rama.

Laing kalibog napud sa mga tawo ang mahitabo ilabi na kabahin sa kun si kinsa maoy angayan nga mopirma sa mga dokumento ug mga transaksyon sa diha sa siyudad.

Importante ang pirma sa mayor sa tanang transaksyon sa siyudad, kana palang daan dako na kaayo unya og impact kun magkalibogay ang mga tawo.

Karong eleksyon nalang unta sila magsinukdanay og kinsay gusto sa mga tawo. Si Rama aduna may tsansa sama sa ubang mga nikandidato nga makadaog karong Mayo nga eleksyon.