Donasyon alang sa CCMC

Tinguha ron ni Cebu City Mayor Raymond Garcia nga ang bisan unsang kantidad nga idonar alang sa paghuman sa katukuran sa Cebu City Medical Center idiritso na sa panudlanan sa dakbayan ug dili i-agi sa Cebu Medical Society (CMS) sama sa gihimo sa gitangtang nga mayor, Michael Rama.

Tumong ni Garcia niini aron masiguro nga kaprotehian ang kwarta ug magamit gyud sa hustong tumong—ang pagpahuman sa nahabiling mga andana sa CCMC.

Sa kasamtangan giingong duna nay P205 milyones nga natigom nga donasyon alang sa CCMC. Ang pundo gideposito sa usa ka account sa CMS nga gituyo gyud pag-abli aron adto ibutang ang tanang donasyon.

Si Dr. Peter Mancao, pangulo sa CMS, mitataw nga kumpleto ang pundo ug wa pay bisan usa ka dako nga nagasto. Apan ang pangutana andam ba ang CMS nga itugyan ang pundong ilang nadawat ngadto sa City Treasurer’s Office?

Unsa man kahay baruganan ni Rama sa plano ni Garcia labi pa nga ang kanhi mayor maoy nagpakauwaw og pakilimos gikan sa dagkong mga negosyante didto sa kaulohan aron makatigom og pundo nga magamit pagpahuman sa tambalanan?

Hinuon way mahimo ang CMS, bisan na si Rama, kun ang mga donors moingon nga ilang bawi-on ang ilang gidonar pinaagi sa CMS ug ilang itugyan ni diritso sa City Hall. Ang sunod pangutana, maghasol pa ba kaha ang mga donors paghimo niini?

Ang sitwasyon sa pagkakaron mao nga ang salapi nga natigom sa CMS maisip pa nga pribadong pundo bisan kun kini gitagana unta sa pagpahuman sa CCMC.  Ug tungod kay probado mana ng maong pundo, maglisod ang kagamhanan sa syudad lakip na ang COA pagpanghilabot unsaon ni paggamit sa CMS.

Mao nga alang nako husto ang plano ni Garcia nga ang mga umaabot nga donasyon adto na idiritso sa City Treasurer. Sa ingon niini, ang pundo maisip nga public funds nga kinahanglang mosubay sa mga lagda sa Commission on Audit (COA) ang paggamit niini.

Kwestiyonable sab tinuod ang paagi pagprotehir kunohay sa pundo pinaagi sa pagpirma og usa ka tripartite agreement diin giapil ang usa ka law firm nga konektado sa kanhi mayor ug ang usa ka kontraktor.