Estorya dugangan, kwarta kuhaan

Gibutyag ni DOH Usec Achilles Bravo atol sa joint hearing sa Senate Health ang Finance committee nga, base sa taho sa mga health workers, adunay mga mayor ug barangay officials nga mibulsa sa kwarta nga gitagana unta sa mga health workers nga miserbisyo sa panahon sa COVID-19 pandemic.  Lisod gyud palabyon sa mga nangatungdanan ang kahigayonan nga makakwarta.  Tataw nga sa gobiyerno ma-ihap na lang ang kasaligan.  Haum niini ang pagya-komedya nga, “Kon estorya, dugangan, pero kon kwarta kuhaan.”  Fezteleern!

May’pa ang beautician

Nanghinaut si Senador Francis Tolentino, atol sa asembleya sa Liga ng mga Barangay sa Probinsya sa Sugbo, nga ang pagkasiak sa politika sa nasud dili unta maka-apektar sa pagpadangat sa serbisyo sa barangay ug nga bisan pa man sa kontrobersya didto sa kaulohan, magpabilin unta nga magkahiusa ang mga barangay officials.  Puno sa pagpaka-aron ingnon ang maong panghinaut. Gani gi-ilotan na man sila karon og term extension bugti sa ilang suporta sa kasamtangan’g mga politiko.  Matud pa sa akong amigo, “Mas maayo pa’ng dumala-on ang nasud sa mga beautician.  Kay kon ang mga beautician ang magpa-bonggahay, basin ma-angayan ang tanan’g katawhan.”  Muleeng!  

Dali nakit-an ang bolpen

Natuldokan na gayod ang panagbangi tali sa kagamhanan sa dakbayan sa Sugbo ug sa MCWD kabahin sa paggamit sa nahauna sa satellite office nga gipanag-iya sa naulahi human mapirmahi ang compromise ug lease agreement kabahin sa paggamit sa maong building.  Giingon nga diplomasya ang gipatigbabaw sa matag habig mao nga dali ra sila nagkasinabot.  Dugang komento sa akong amigo nga, “Dali ra na-compute ang bayranan ug dali ra usab nakit-an ang bolpen nga gigamit sa pagpirma sa kontrata kay bugnaw man ang panghunahuna sa matag habig.”  Fishkots!

Sangputanan sa kurapsyon

Matud pa ni Marikina Representative Stella Quimbo, ang Executive Order No. 62 nga nagmando alang sa pagpakunhod sa rice levy gikan sa 35% ngadto sa 15% wala makakab-ot sa katuyoan niini nga mopakubos sa presyo sa bugas, hinunoa, nakapaalkansi kini sa gobyerno og balor P12 bilyones nga kita sa buhis.  Nagtoo ang kongresista nga adunay panagkumboya sa mga importer kabahin niini.  Morag tinarong man unta sa sinugdanan ang katuyoan sa maong executive order apan nasudlan lang og bakukang ang ulo sa mga nagpasiugda niini.  Mao kana’y giingon nga, “Ang kurapsyon sa labing maayong katuyoan, makapahimugso gayod sa labing laksot nga sangputanan."  Madahaan!

Sila ra’y mabulahan

Segun kang DPWH Regional Director Alex Bote, nagpabilin nga committed ang ilang ahensya sa pag-implementar sa mga flood mitigation projects apan gihimug-atan niya nga kinahanglan usab ang tabang ug aktibong partisipasyon sa komunidad labi na sa aspeto sa waste management.  Dili malalis nga dakong hinungdan sa pagbaha ang pagpataka og labay sa atong basura.  Apan nasagmuyo lang ang akong amigo ni’ng panawagan sa DPWH tungod kay matud pa niya, “Kon pagsulbad sa baha ang hisgutan, patabangon ang katawhan.  Apan kon binahinay na sa kickback, sila ra ang mabulahan.” Pagkatoytoy!