EDITORYAL - Krimen ug drugas

Ang Cebu City nakatala og ubay-ubay nga mga insidente sa pagpamusil sa nakalabay nga mga buwan ug ning buwan sa Disyembre, sagad niini giingong may koneksyon sa ilegal nga drugas.

Dunay mga netizens nibasol dayun sa kasamtangang  administrasyong Marcos.

Ingon ana lang kasayon para sa uban ilabi na sa mga wala gyud magsubay sa mga panghitabo nga modiretso ra og pangita og basolon , wala hunahunaa ang kinauyokan rason nganong nahitabo kining maong mga krimen.

Duna gyuy problema sa ilegal nga drugas, dugay na kini gikan pa sa panahon nga marijuana pay gikabuangan sa mga adik, karon klase-klase nang kemikal sama sa shabu, heroin, cocaine, ug regulated drugs sama sa nubain ug uban pa. Sa nakalabay nga administrasyong Duterte, gisaad niyang papason kini sud sa tulo ka buwan, duguon ang iyang gubat batok ilegal nga drugas, daghan ang miabiba.

Nahitabo ang Oplan Tokhang , daghang nangamatay nga drug suspects, apil ang mga inosente ug mga gihikawan sa due process tungod sa matud pa reward system para sa mga makapatay og durugista.

Apan ang saad nga tulo ka buwan ni Duterte nahimong usa ka tuig, nahimong tulo ka tuig, lima ka tuig hangtud nahuman nalang iyang termino wala masulbad ang problema sa ilegal nga drugas.

Gibanabanang tres ngadto sa unom ka libong drug suspects ang napatay kay “nanglaban,” nga giingon sa mga human rights advocates gamay ra sa tinuoray nga ihap nga miabot og 30 mil.   Daghan ang nangadakpang mga dagko ug gagmay nga drug pushers. Apan sa naghinapos nga bahin sa termino ni Duterte, kinilo naman hinuon ang mga shabu nga pinutos og Chinese tea bags ang nangasakmit.

Nagpadayon kini hangtud karon sa panahon na ni Marcos. Apan sa mga anti-drug operations karon ubos sa administrasyong Marcos, ang mga bag-ong nangadakpan nga nakuhaag kinilo nga shabu, mitug-an man nga ang ilang mga agalon o kontak naa man sa sud sa mga prisohan, mga nangadakpan sa panahon pang Duterte.

Sa ato pa, wala gihapon sila mohunong.

Di ni problema lang sa gobiyerno o sa kapolisan, problema kini sa tibuok katilingban. Dako og papel ang publiko sa kampanya batok niini ug kini magsugod diha mismo sa pamilya ug dili anang magpataka og pamasol apan walay gibuhat.