Pasangil kontra pasangil

Giibot sa mga polis ang tubo nga giingon nga maoy naghatod og hangin aron makaginhawa si Pastor Apollo Quiboloy kinsa gituohan sa mga polis nga nagtago ilawom sa iyang 30 ka ektaryang Compound sa Kingdom of Jesus Christ o KOJC.

Gamit ang metal detector nasayran sa mga polis nga nangita ni Pastor Quiboloy nga ang tubo nga ilang giibot mao ang giagian sa hangin nga giginhawa sa pastor tungod kay nakadungog sila og pinitik sa kasingkasing.

Apan ang mga sakop sa KOJC namasangil sa kapolisan nga dili si Quiboloy ang ilang gipangita kun dili bulawan tungod kay ang gigamit sa mga polis nga metal detector sinsitibo kayo nga hasta ang mga bulawan mailhan.

Nagkinihaay usab ang mga polis ug mga sakop sa KOJC tungod sa pasangil nga pagpasakitay sa matag habig.

Dakong hagit sa kapolisan ang pagdakop ni Quiboloy tungod kay gawas nga nangangkon kining adopted nga anak sa Ginoo, gipanalipdan pa g'yud kini sa iyang mga sakop ug inpluwensiyadong tawo. Wala pa kini labot sa iyang mga nakat-onan sa mga tawong maayo motago.

Ang pagtago ni Quiboloy sa bunker ug sa paghimo og bunker sulod sa lapad niyang compound inpluwensiya kini gikan sa pangulo kaniadto sa Iraq nga si Saddam Hussein nga sa kadugay nga pagpangita kaniya sa mga Amerikano natultulan ra gayod sulod sa bunker nga iyang gitagoan.

Ang paggamit og tubo ni Pastor Quiboloy aron siya makaginhawa samtang nagtago ilawom sa bunker inpluwensiya kini gikan ni kanhi Senador Gringo Honasan nga eksperto sa pagtago.

Ang nagtago nga si Lt.Col. Gregorio Honasan naglubong sa iyang kaugalingon ilawom sa kalapokan ug maoy gigamit sa pag ginhawa ang tukog sa usa ka sagbot nga iyang gipaak ang tumoy samtang ang laing tumoy niini iyang gipagimaw aron adto moagi ang hangin nga iyang gigamit sa pag ginhawa.

Ngano man tuod nga ang tawong nangangkon nga walay kasalanan mitago man? Dili ba ang sad-an ra man ang motago?