Ang kasakit sa namatyan gihimong puhonan sa uban

Taliwala sa daghang nag-ilaid sa kalisod gumikan sa nasinating pandemiya, anaa usay daghan ang nabulahan kinsa mipahimulos sa kalbaryong gipas-an sa uban basta lang makasapi. Kuhaan lang nako og base ang nahitabo sa mga minatay nga gipangbutang lang sa semento sulod sa usa ka balay nga dili matawag nga morgue kay kong tan-awon bodega gyud dili sa mga butang ug dili sa mga minatay.

Dili lang usa ka punerarya kon dili laing duha ang migamit niini isip pundohanan sa mga minatay nga nakalinya sa cremation sa paglubong nga wala gani masayod ang tagtungod nga gibastos na ang patay’ng lawas sa mahal nila sa kinabuhi.

Nisakay usab ang mga punerarya (dili man tanan pero ang maigo niini maoy naghimo) sa sitwasyon kay lagi kanunay man pud ipahibawo sa mga opisyal nga daghan ang nangamatay ug hurothurot na ang lubnganan sa mga menteryo. Dunay gamay’ng kamatuoran apan mapangitaan pa man diay og pamaagi nga mahipos dayon ang mga minatay nga dili na kinahanglang ipundo pa sa storage facility nga dili gyud intawon makatawo. Patay na gisamotan pa og patay kay tataw nga gibastos nila sa pagpahiluna nga gipakisama sa usa ka karne nga gibutang sa freezer ug gipakisama sa kahoy o noog nga gibutang sa salog.

Sumala ni Konsehal Dave Tumulak nga nagkunsabo ang uban nga punerarya nga dramahon ang pamilya sa mga namatay nga ingon nga wala pay available nga schedule sa cremation o wala pay luna sa sementeryo nga kalubngan busa gikinahanglan nga ibutang pa kini sa storage facility hangtod nga adunay available. Ang pamilya pud lagi nga walay kasayoran sa tinuod nga sitwasyon motuo ug mosugot nalang nga mangita og katipigan sa ilang minatay bahala na og makautang kay wala may kapilian kay dili man pud pwede dad-on sa ilang balay.

Dinhi na modugo og samot ang kasingkasing ug ang panudlanan sa tagtungod nga nahabus nang daan tungod sa kamahal sa bayad sa storage fee nga P13,000 ang unang adlaw ug P8,000 ang mga mosunod nga adlaw.

Sa kadaghan sa mga namatay nga ilang giserbisyohan segurado nga puno kaayo ang ilang bulsa gikan sa mga tagtungod nga nagbangutan. Pait palandungon nga gihimong puhonan sa uban ang kasakit sa mga namatyan aron lang mokita og dako. Sa giingon ni Dr. Jeffrey Ibones, ang pangulo sa Cebu City Health, nga mahimong maka-coordinate sa ilang buhatan ang mga tagtungod aron mapangitaan og kalubngan ang mga minatay. Dili dayon motuo sa isulti sa mga punerarya kay basin lahi ang kasayoran nga ilang isulti aron makasapi sila. Dili tanan ingon ani ha kay naa pud bayay mga punerarya nga diniyos ang ilang pagserbisyo. Batobato sa langit lang ni ang maigo maoy masakitan.