Kalagot makapaalaot

Ginaingon: ‘In every action, there is a reaction.’ Or, sa matag unsay gibuhat o gisulti, kini adunay kaugalingong sumbalik. May sumbalik nga makaayo ug dunay makadaut.

Ang buhat o pulong nga puno sa gugma ngadto sa atong isig ka ingon, moanig kalipay. Ang buhat o pulong nga tugob sa kalagot moresultag kagul-anan. Busa, maayong likayan ang pagdagkot og pabilo sa kasuko aron walay kinabuhing mausik.

Hinumdomi ang sugo sa Ginoo kanunay: “Higugmaa ang silingan sama sa paghigugma sa imong kaugalingon. Higugmaa imong mga kaaway.”

Kaanindot unta, kon kitang tanan, misunod sa Iyang mga pulong. Wala untay brodkaster, diyornalista o komentarista nga pahilomon pinaagi sa mga masuk-anong bala.

Wala untay binuhat ang kalit lang mangahay-ad sa kadalanan human luthanga sa nagsiyaok nga pistola. Ug labaw sa tanan, wala untay mga politikong magpunay’g away-sinawayay, diin usahay mosangko pa sa pagpinatyanay.

Mga maot hitabong mapugngan unta, kon ang tawo wala pa magpaanod sa makusog sulog sa kalagot. Ang pangutana: ‘Kadtong nakabuhat og dugoong salaod, pakatulgon kaha iyang tanlag? Wala kaha magmahay dihang milurang na ang naghaguros niyang kasuko ug maoy mipuli ang kahayag sa espirituhanong kahimatngon?’

Niining bag-o, dunay usa ka pag-umangkong naglagot human singhagi iyang iyaan sa ilang silingan, kinsa gipaningil sa P300 nga utang. Diin, misangko sa mainitong panaglalis. Ug miresulta sa kamatayon sa nangutang tapos pusila sa pag-umangkon.   Aw, napriso hinuon siya!

Usab, dinhay nakapalit og bag-ong pistolang paltik. Pag-abot sa ilaha, iyahang gitistingan. Pastilan, bisag giunsag kablit, wala man mobuto. Puwerte niyang sukoa! Dukdokon bitaw niyag maayo sa martilyo ang pistola, da, mibuto lagi! Pero puwerting igoa ug pisoka sa usa niya ka mata. Wala lang siya maospital. Gidakop pa sa miresponding mga polis.

Dili kakompiyansahan ang kasuko. Hunahunaa! Ultimong kahoy nga gamitag todong kusog tungod sa grabing kalagot nga gahi kaayo bughaon, usahay mobawos man ganig lambos sa imong nawong aron ka mabuklan, unsa na kaha ang mga linalang nga may kasingkasing mobatig kasakit?

Sa Oktubre pa ang pinaylanay’g ceriticate of candidacy para sa 2022 national election. Pero mipakapaka na ang dakong gubat sa politika. Bomba didto, bomba diri! Unta, dili maoy paharion sa dughan ang kalagot. Buwahan, wallay bisan usa ang maalaot.