Mikabayo sa krisis

Problema sa transportasyon maoy misugat sa mga trabahante dinhi sa dakbayan sa Sugbo nga mibalik na sa trabaho sugod niadtong Lunes human sa duha ka buwan nga lockdown tungod sa COVID-19 pandemic.

Kini tungod kay wala pa makabiyahe pagbalik ang mga public utility jeepneys bisan pa og gitugot na ubos sa executive order ni Mayor Edgardo Labella  nga sila makadagan ubos sa kondisyon nga katunga lang sa ilang capacity ang pasakyon nga mga pasahero aron pagtuman sa lagda mahitungod sa "social distancing."

Ang hinungdan tungod kay nagkinahanglan sila og special permit gikan sa Land Transportation Franchising and Regulatory Board (LTFRB) aron sila makapamasahero pagbalik.

Nakasamot sa kakuwang sa transportasyon mao ang di masabot nga lagda sa Inter-Agency Task Force on Emerging Infectious Diseases nga nagdili sa pag-angkas sa motorsiklo.

Maibanan unta ang dakong kakuwangan kun gilibkas pa sa Department of Transportation (DOTr) ang dili gyud masabot nga lagda pagdili bisan sa mga managtiayon nga maglumon sa motorsiklo.

Dili sab masabtan nganong pakuhaon pa og special permit gikan sa LTFRB ang mga PUJ sa dili pa makabiyahe pagbalik nga duna naman silay daang rota nga lakip sa ilang mga prangkisa.

Dili ba ang special permit kinahanglanon lang kun mogawas ka sa imong naandang rota?

Pero og mobalik lang sa ilang operasyon ang mga PUJ diha sa naandan nilang rota, nganong kinahanglanon man ang special permit?

Kun kabahin ni sa pagpugong nga mokatap ang kagaw sa COVID-19, dili makatabang ang special permit. Ang angayang siguroon sa mga tigpatuman sa balaud nga masunod ang social distancing diha sa mga pampublikong transportasyon.

Gigamit ba lang nga rason sa LTFRB ang pandemic aron hingpit na nga mahanaw sa kadalanan ang PUJ ug mapatuman ang dugay na untang modernisasyon niini?

Dugay na nga buot i-phase out sa gobyerno ang PUJ aron hulipan sa mga modernong sakyanan sama sa gigamit sa Beep.

Apan mataghigayon nga iduso kini sa gobyerno sugaton sila og protesta sa mga driver ug operators.

Kini na kahay kahigayonan aron molampus ang DOTr sa pagpatuman sa programa?

Kun kini maoy ilang plano, angayan natong pahinumduman ang LTFRB ug DOTr nga hugot nga gidili sa Bayanihan Act ang paggamit sa krisis aron ipatuman ang PUJ modernization.

Dili sab makiangayon alang sa mga trabahante nga magbaklay paingon sa ilang mga trabaho tungod kay nikabayo sa krisis ang mga tapulan nga ahensiya sa gobyerno aron paghimong sayon sa ilang trabaho.