Hawani na tawon

Awhagon nako pagbalik ang kadagkoan sa Cebu City Transportation Office (CCTO), ilabi na ang mga sakop sa Cebu City Traffic Management Board, nga mosugod na unta pagpangita’g paagi aron malikayan ang problema sa grabeng trapik diha sa downtown area.

Nakita man gud nako nga nagpadayon ang gihimong pagpagamay sa Osmeña Boulevard kay ang daplin sa four-lane road gikan sa Plaza Indepenmdencia paingon sa Colon Street, giibanan og tagsa ka lane ang matag direksyon.

Aw, kon pugson gyud pag-agi sa duha ka sakyanan nga mag-ampad diha sa gipagamay nga karsada, pwede ra man basta mga gagmay, sama sa mga awto. Apan timan-i nga ang plano mao nga dili na paagion sa Osmeña Boulevard ang mga private vehicles.

Kon ako’y pagbut-on, kon dili na man paagion ang mga private vehicles diha sa Osmeña Boulevard, mas maayo nga karon pa lang daan, dili na paparkingan ang daplin sa mga secondary roads nga parallel sa Osmeña Boulevard.

Unsa ning mga karsadaha? Ang Manalili Street, Legaspi Street, Pelaez Street, Lapu-Lapu Street, aron anha mangagi ang mga sakyanan nga dili na paagion sa Osmeña Boulevard. Kanus-a pa man ta molihok, unya na ba kon magkaguliyang na?

Usbon nako, pila ra may bahin sa siyudad gikan sa parking collections nga gikolekta sa Tokagawa, ang kompaniya nga gikontrata sa siyudad aron maoy mangolekta sa parking fees sa mga tag-iya’g sakyanan?

Ang “share” sa siyudad gikan sa koleksiyon sa Tokagawa, 22 porsiyento lang. Pananglit P20 ang makolekta sa usa ka oras nga pagparking, ang siyudad makadawat lang og P4.20 samtang ang P15.80 mahipunta sa panudlanan sa Tokagawa.

Matud pa lagi sa Commission on Audit (COA) nga ang pagsu’d og kontrata sa siyudad ngadto sa Tokagawa aron maoy mangolekta sa parking fees, tabla ra nga gihatagan nila’g higayon ang private company nga makanegosyo gamit ang karsada sa kagamhanan.

Ambot ngano nga wa man gyud makahunahuna niini ang atong mga opisyal dinhi sa Cebu City. Kon ang CCTO pa maoy gitugyanan sa pagpangolekta sa parking fees, makatigum pa unta ang CCTO og pundo nga magamit sa pagpalambo sa atong traffic system.

Unta dunay mga opisyal nato sa siyudad nga makahunahuna nga dakong sayop ang gihimo nga kontrata. Pero sagdi lang, mentras tanto nga wa pa sila makahunahuna niini, awhagon nako ang CCTO ug Traffic Management Board nga hawanan na nato ang mga secondary roads nga nalumbay sa Osmeña Boulevard.

Kon magpanuko gyud mo pagwagtang dayon sa parking area niining mga karsadaha, sige “one side parking” lang kay moluag-luag na tingali’g gamay ang karsada. Maayo unta og mabasa kini ni Konsehal Rey Gealon, ang chairman sa Traffic Management Board ug labaw na ni Cebu City Mayor Raymond Alvin Garcia.