Kauhaw sa dugo
Dihang nagkadaghan ang balikas ni kanhi Presidente Rodrigo kay gikapoy na og tubag sa mga pangutana atol sa 13 ka oras nga public hearing sa House Quad Committee niadtong Miyerkules, gidasonan niyang awhag pagtangtang sa bastos niyang mga pulong gikan sa rekord pinaagi sa pagsugyot nga apilon pagtangtang ang hugaw niyang baba.
Dihang niawhag ang mga kongresista sa pag-delete sa mas sagunson niyang balikas dayong human sa hearing, nisugyot siyang i-delete na lang sab ang tanan niyang sulti kay isipon ra man gihapon sa iyang mga kaatbang nga pulos palusot.
* * *
Nga mahimong mao sab ang tan-aw sa mga abogado nga nagsubli sa iyang mga testimoniya sa QuadComm ug sa siyam ka oras nga public hearing sa Senate Blue Ribbon subcommittee niadtong Oktubre 28, 2024:
· Niangkon og responsibilidad sa tibuok drug war pero nanghunaw sa indibiduwal nga mga kaso sa extrajudicial killings (EJKs);
· Nanghambog nga daghan og napatay pero wala magtagad sa pag-ila sa mga biktima; ug
· Nagtukod og death squad pero patay nang mga sakop (iyang sulti sa Senado) o dili kanganlan kay mameligrong bawosan (iyang sulti sa House).
* * *
Nikumpisal sab si Duterte nga panghadlok ra sa mga kriminal ang mga istorya sa iyang pagpangunay sa pagpatay:
· Bakak diay kuno ang pangangkon nga dunay negosyante nga iyang gihagbong gikan sa helikopter dihang mayor pa sa Davao City;
· Wala nang kaseguro kon siya ba o ang kaubang mga polis ang nakapatay sa kidnappers nga nanglugos sa ilang biktima; ug
· Gilatigo ra ug wala diay niya patya ang mga polis nga nasakpang nagpabadlong.
* * *
Sama ni Kongresista Jinky Luistro sa Batangas, naglaom sab ang katawhan nga ang kaisog ni Duterte sa pag-angkon og responsibilidad sa tibuok drug war mao sab ang kaisog nga iyang huptan sa pagpanubag sa mga kaso sa laktod nga pinatyanay, labi na sa mga biktima nga wala mosukol ug wala gani bisan unsa nga koneksiyon sa ilegal nga drugas.
Pero naklaro na nga kaisog mao diay ang kataposan natong mapaabot gikan sa tawo walay pupanagana nga nigamit sa mga polis—pinaagi sa pagtental nila og bayad ug pag-ulug-ulog nila og proteksiyon—aron lang pagtagbaw sa iyang walay kinutoban nga kauhaw sa dugo.
* * *
- Latest
