Nag-anam na’g ka wa’a ang Sto. Niño sa mga design sa t-shirt

Alang nako, ok lang ang pag-commercialize sa pagsaulog sa Fiesta Señor. Dili ni kalikayan. Mga kasaulogan sama niini ka daku, dili nato kalikayan ang paglihok sa mga negosyante pagpahimulos sa higayon -- pagdugang sa ilang ganansiya. In the first place, magtukod ka’g negosyo aron makasapi. Ug ang Sinulog festivities usa sa makapadugang sa ganansiya. Ok lang ni.

Apan, kining atong pagpanapi sa Sinulog, unta dili mawala ang kahulogan sa kasaulogan -- nga dili unta mawani ang Santo Niño. Siya gayud ang sentro sa festivities.

Kahinumdom ko nga diha’y tuig nga gibuwag ang religious aspects sa pagsaulog sa Fiesta gikan sa Sinulog grand parade. Nagtuo ang mga organizer nga mominos ang mamiyestahay ug daghan gihapon ang motambong sa parade.

Sayop sila. Daghan gihapon ang nanambong sa mass-novena, sa procession ug ubang kalihokan sa simbahan. Sa ato pa, ang kinabag-ang bisita mga deboto sa Santo Niño ug naminos ang nanambong sa street dancing. Kahinumdom mo ini?

Anyway, niining pag-commercialize sa Fiesta Señor ug sa Sinulog festival, dili nato ipadaplin ang hinungdan nganong adunay Sinulog.

Karon, sa mga t-shirt, samtang nagkanindot ug nagka-mahal, mora’g wa’a nay labot ang Sto. Niño. Maoy ilang gi-promote ang Dinagyang ug Ati-Atihan. Mao sab ni ang atong makita sa  mga newspaper ads... nagdaghan ang maskara. Ngano man ni?

* * *

Ang Department of Science and Technology (DOST) miawhag sa matag Filipino pag-set sa atong mga relo subay sa Philippine Standard Time. Matud nila, ang bag-ong tuig, naghatag kanato’g higayon pag-synchronize sa atong mga orasan ug pagbag-o sa naandan nga Filipino Time, nga sa mga miting o mga appointment, kun i-set at 4:00 pm, nagpasabot nga 5:00 o 6:00 pm ang actual nga miting. Filipino time.

Bag-ong tuig...bag-ong Filipino Time. Pag-alkontra sa habitual natong tardiness, kampanya sa DOST: “Juan Time...Pinoy Ako...On Time Ako.” Mahimo kaha ni nato nga mao may atong naandan ang dili pagtuman sa mga appointment?

Pinoy Ako...Late Ako, maoy husto? Pagkabadlungon baya pud nato uy! Gamay ra kaayo ning butanga...yet di ta katuman. Unsa na kaha ang kaakohan pagpaugmad sa atong nasud?

Di gani ta katuman sa “no pedestrian crossing, keep off the grass, gidili ang pagpangihi dinhi, left lane must turn left, no littering, no smoking, no fixers allowed, vote wisely” ug uban pang mga gagmay’ng gimbuhaton sa usa ka maayong lungsoranon.

Unya, mangutana ka kun nganong wa’a gyud mouswag kining atong nasud? Angay hinumdoman nga ikaw Pinoy maoy nagbuot niining tanan. Kini tungod kay ikaw man ang hari sa pangagamhanang gawasnon. Busa, kun magpabilin kang badlungon, di gyud mouswag kining atong nasud. Kining tanan nag-agad kanimo, Pinoy!

Bag-ong Tuig, gawas sa bag-ong Filipino time, di na ka magpapalit karong tuig 2016?