Suwerte sa classmates
Kangilngig sa mga sakop sa Philippine National Police Academy (PNPA) Class 1996 ug 1997. Nahibaw-an sa House Quad Committee nga:
Nagtapok sa Davao City duha ka adlaw sa wala pa moasumir si kanhi Presidente Rodrigo Duterte sa Malakanyang sa 2016;
Gipangulohan sa labing suod ni Duterte nga silang Royina Garma sa Class 97 ug Edilberto Leonardo sa Class 96;
Nauyonan nga “Davao template” maoy sundon pagpatuman sa nasudnong kampanya batok sa ilegal nga drugas; ug
Nagsabot nang daan kinsay itudlo sa asang bahin sa Pilipinas aron pagsegurong magmalampuson ang kampanya.
* * *
Dihang gitudlo ni Duterte si Garma sa Philippine Charity Sweepstakes Office (PCSO) niadtong 2019, ang mga sakop sa PNPA Class 1996 ug 1997 morang nakadaog og, pasayloa nga walay laing pulong nga nahunahunaan, lotto. Sila ang nabuhong mga prangkisa sa small town lottery (STL) ug Peryahan ng Bayan sa Sugbo, Batangas ug ubang bahin sa Pilipinas nga agresibong gipalapdan ni Garma.
Dihang nangahas paglawgaw sa ilang negosyo ang PCSO board secretary nga si Barayuga, gipasanginlan silang Garma, Leonardo ug kaubanan nga nagkonsabo sa pagpatay niya ug pagtabon sa krimen.
* * *
Kon tinuod ang pasangil, lisod tuohan nga nagbuot-buot silang Garma, Leonardo ug kaubanan sa paghipos og retiradong heneral sa kapolisan ug sakop sa Philippine Military Academy (PMA) Class 1983. Bisan sa ilang kasuod sa presidente, dili silang kasagang sa posibleng pag-ulbo sa kasuko sa classmates ni Barayuga nga naglakip nilang Eduardo Año, secretary sa Department of Interior and Local Government (DILG), ug Anselmo Simeon Pinili, chairperson sa PCSO.
Nagkinahanglan ug mahimong nakakuha sila sa pagtugot ug proteksiyon sa mas tag-as nga mga opisyal.
* * *
May mga timaan sab nga ang pagpalapad sa STL dili salida lang ni Garma. Kay ang STL gitumbok ni Police Lt. Col. Jovie Espenido sa nahauna niyang testimoniya sa quad-comm nga usa sa mga tinubdan sa kuwarta gibayad sa mga polis ug vigilantes nga laktod nga nipatay sa gidudahang mga durogista.
Nga nitakdo sa report sa Commission on Audit (COA): Niabot og P619.86 milyones ang pundo sa STL nga nahatag ngadto sa kapolisan nga walay dokumento unsay gigastohan. Nahunong lang ang paghatag sa pundo dihang ni-resign si Garma sa PCSO sa 2022.
- Latest
