Custody sa illegitimate nga anak

Dear Atty. Divine,

Duna koy pangutana labot sa akong illegitimate nga apo nga karon 7 years old na. Bag-o lang milarga ang inahan sa abroad aron motrabaho og iyang gibilin ang bata diri nako. Karong bag-o, nanawag ang amahan kay iya kunong kuhaon ang bata. Wa ko mosugot kay ang bata diri nagdako namo ug gawas pa, wa siya magsuporta niini. Apan matud sa amahan nga tungod kay wala man ang inahan dapat siya isip amahan maoy mo-custody sa bata. Unsay angayan namo nga buhaton aron dili makuha ang bata? Daghang salamat. -- Linda

Dear Linda,

Basi sa Article 176 sa atong Family Code, ang inahan sa illegitimate nga bata mao gyud ang adunay parental authority or mo-custody sa bata. Kini bisan pa kun ang inahan atua magtrabaho sa abroad kay ang physical absence sa inahan tungod sa iyang trabaho dili kana mamahimong basihan nga tangtangan siya sa iyang katungod sa pag-custody sa iyang anak. Sa ato pa, bisan kun modangop sa korte ang amahan sa imong apo  dako ang posibilidad nga adto gyud gihapon ang korte mopabor sa inahan sa bata nga maoy mo-custody sa imong apo. Basi sa mga nangaging desisyon sa Korte Suprema, ang inahan mamahimo lang nga matangtangan sa iyang parental authority or custody sa bata kun mapamatud-an sa korte nga unfit ang inahan nga maoy mo-custody sa bata tungod sa iyang pag neglect o pag-abandon sa bata, pag-abuso sa bata, pagka palahubog, og pagkagumon sa ginadiling drugas, o pagka immoral. Apan sa inyo nga kaso, ang inahan sa bata nanarbaho sa abroad ug ang bata iyang gibilin kanimo nga maoy lola sa bata busa way lig-ong basihan nga kuhaon sa amahan ang bata. Kun motawag kanimo pagbalik ang amahan, sultii siya nga ang inahan sa bata maoy adunay katungod custody sa iyang anak. Thank you and God Bless. -- Atty. Divine

Alang sa inyong pangutana, palihug lang sa pag-email sa [email protected] ug akong tubagon ang inyong pangutana pinaagi sa akong column matag Miyerkules, Sabado ug Domingo.