Mamahimo bang makiha ang boyfriend nga mangulata sa iyang hinigugma?

Happy Easter sa tanang readers sa Banat News. Karon maoy katapusang adlaw sa Marso nga diin atong gisaulog ang Women’s Month. Basi sa records sa DSWD padayong misaka ang kaso sa  kababayen-an nga giabuso sa ilang bana. Apan kining maong matang sa pagpangabuso nahitabo dili lang sa mga managtiayon kondili lakip na sa mga manag-uyab ug maglive-in partner. Unsa bay angayang buhaton kun ikaw kulatahon sa imong hinigugma? Kana nga pangutana ang atong tubagon karon.

* **

Dear Atty. Divine

Aduna koy live-in partner ug tulo ka tuig na mi nga nagpuyo, wa mi anak apan ang akong problema kay grabe ka seloso ug magsige lang mi  og away. Iya kong dapatan kun mag-away mi ug makadaghan na kini niya buhata. Niadtong Pebrero grabe gyud ang among away kay iya kong gitionan sa iyang pusil ug iya kong gihulga nga patyon. Nasakpan man gud na nako siya nga aduna siyay laing babaye. Pagkakaron milayas ko sa among gipuy-an tungod sa akong kahadlok. Naglibog ko atty kun unsay angayan nako nga buhaton aron mahunong na kining iyang pagmaltrato nako. Hinaut nga imo kong matabangan sa akong problema. — Shy girl

* * *

Dear Shy girl,

Di ka kinahanglan nga mag-antos anang imong live-in partner nga kusog mangulata kanimo, aduna tay balaud nga nagprotihir sa kababayen-an kining Republic Act No. 9262 kon Anti-Violence Against Women and Their Children. Kining maong balaud naglatid nga usa ka dakong krimen ang pag-abuso sa usa ka asawa, kanhi asawa, hinigugma ug ni bisan kinsa nga diin aduna kamoy sexual o dating relationship. Sa ato pa, bisan ang imong boyfriend mamahimo nimong makiha niini kun siya miabuso kanimo nga miresulta sa imong pag-antos pinaagi sa  physical, sexual, psychological harm or suffering, or economic abuse. Ang iyang pagpanghulga diha kanimo nga iya kang patyon violation sab kana sa maong balaud lakip na ang iyang pagpangulata ug uban pang matang sa pagpangabuso diha kanimo.

Ang maayo nimong buhaton karon mao ang pagpasaka og kriminal nga kaso batok sa imong live-in partner tungod sa iyang nahimong kalapasan sa maong balaud. Adto kini nimo ipasaka sa Prosecutor’s Office diha sa inyong lugar. Mamahimo sab ka nga mo-apply  og Protection Order aron di na siya makaduol kanimo ug di na mausab pa ang iyang pagpamun-og kanimo. Mamahimo nga adto ka mangayo og protection order sa inyong barangay or pwede sab nga adto nimo kini ipasaka sa Korte. Hinaut nga akong natubag ang imong pangutana. — Atty. Divine

Alang sa inyong pangutana may kalabutan sa inyong problemang legal, ipadala lang sa Legal Corner sa Banat News or email sa [email protected] ug akong tubagon ang inyong pangutana pinaagi sa akong column matag adlaw’ng Miyerkules ug Domingo.