Duha gipamusil patay

CEBU, Philippines — Patay ang usa ka 22-anyos nga lalake nga construction worker human kini gipaulanan og bala samtang naglakaw padung pauli diha sa Sitio Lower Calvary, Barangay Apas, siyudad sa Sugbo, Lunes sa gabii, Enero 6, 2025.

Ang biktima mao si Rico Camay Pepito, 22, lumad nga taga Barangay Argawanon, Lungsod sa San Remigio ug kasamtangan nga nagpuyo sa Sitio Rotunda, Barangay Apas.

Sa imbestigasyon sa Mabolo Police Station 4 ang biktima gikan sa gitrabahoan ug naglakaw kini padung pauli sa giabangang balay.

Apan usa sa mga mamumuno ang nipusil sa biktima samtang nagtalikod kini ug gitiwasan sa dihang natumba na sa dalan hinungdan sa hinanaling kamatayon sa biktima.

Nagkanayon si Police Major Romeo Caacoy Jr., hepe sa Mabolo Police Station 4 nga posible giatangan na daan ang biktima sa dapit ug dihang niagi didto gihimo ang pagpamusil.

"Kani siya base sa statement sa iyang ka live-in na involve pud ni siya og ginadiling drugas unya karon mao lagi naay magsige og panawag niya unya dili na niya tubagon so mao nag among gisubay karon kay possible aduna ni kuan sa illegal nga drugas gihapon," matud ni Caacoy.

Naa na sila'y persons of interest ug nasubay na sab nila kun kinsa ang ka transaksiyon sa biktima sa wala pa nahitabo ang pagpamusil.

Subayon sab sa kapulisan kun nadakpan ni kaniadto ang biktima apan ang impormasyon nga nadawat sa kapulisan natangtang sa trabaho ang biktima tungod sa illegal nga drugas.

Sa laing insidente sa pagpamusil, patay ang usa ka 42-anyos nga lalake human kini gipusil samtang nagmaneho sa iyang motorsiklo sa Sitio Anislagan, Barangay Guadalupe, dakbayan sa Carcar sa miaging adlaw.

Ang biktima mao si Homer Merida Rebuyas, 42, nagpuyo sa Upper Cogon, Barangay Poblacion 1, dakbayan sa Carcar.  Samtang padayon pang giila kun kinsa ang mamumuno.

Sa imbestigasyon sa Carcar City Police Station ang biktima sakay sa iyahang motorsiklo paingon sa Carcar City Proper sa dihang ang wala pa mailhing mamumuno nga sakay sab og motorsiklo misunod sa biktima.

Pag-abot sa naasoy nga dapit gipusil ang biktima makadaghang higayon gamit ang wala pa matino nga kalibre sa armas.

Naigo kini sa nagkadaiyang parte sa lawas ang biktima nga maoy hinungdan sa hinanaling kamatayon niini.  IBM BANAT NEWS