Operasyon sa kapolisan gipaspasan tungod sa Sinulog

CEBU, Philippines — Mas gipaspasan sa kapolisan sa Sugbu ang mga operasyon batok sa tanang matang sa krimen samtang nagkaduol na ang Sinulog ug Pista Senyor alang sa pagsiguro sa kahapsay ug luwas nga selebrasyon.

Sa mga operasyon batok ilegal nga drugas nga gihimo sa Pari-an Police Station 1, Carbon Police ug Philippine Drug Enforcement Agency(PDEA)-7, walo ka mga tawo ang nadakpan.

Nasikop sa taga Pari-an Police Station si Ruel Rubi Rodriguez,32, diha sa Sitio Riverside, Barangay Lorega San Miguel, Lunes sa gabii. Nakuha gikan niya ang 5 gramos nga shabu.

Nadakpan sab sa Carbon Police Station 5 ang duha ka drug personalities diha Sitio Ermita Proper sa Barangay Ermita si Ramir Conchas Jumag alyas JR, 29, nga nasakmitan og 5 gramong shabu. Sunod nasikop si Willington Hermosa Rodriguez alyas Pare sa buy-bust operation sa Sitio Bato nga nakuhaan og 10 gramos nga shabu nga nagkantidad og P68,000.

Samtang lima ka indibidwal ang nadakpan sa PDEA-7 ug Mabolo Police Station 4  gikan sa drug den sa Sitio Baca, Barangay Apas ning siyudad.

Nadakpan sa operasyon ang subject ug drug den maintainer nga si alyas Romualdo ug kaipon niining si Mary Cris.

Nadakpan sab ang tigbisitahan sa drug den nga sila si alias Maricor, 39,   taga Barangay Tisa; alias Roel, 36, ug alias Lucilo, 50, parehong taga Banilad, Mandaue City.

Nasakmitan ang suspetsado og 47.85 grams nga shabu nga nibalor og P325,380, buy-bust money, cash nga P150 nga gituohang halin sa illegal drugs, ug nagkalain-laing drug paraphernalia.

Sa buwag nga operasyon sa Mabolo Police Station 4 Cebu City Police Office(CCPO), usa ka Wyleen Pacaña Banono, 20, ang ilang gidakop human naaktuhang naghupot og shabu ug armas sa nag-roving nga mga polis diha sa Sitio Mabuhay, Barangay Luz, siyudad sa Sugbo kagahapon sa kadlawon, Martes, Enero 7, 2025.

Nasakpan kini nga nagdala-dala og 4.5 grams nga shabu nga nagkantidad og P30,600 ug kalibre .45 nga armas.

Nagkanayon si Police Major Romeo Caacoy Jr., hepe sa Mabolo Police Station 4 nga base sa gibutyag sa suspek ang armas giingong proteksyon niya sa iyang kaugalingon.

Sa Talisay City, sunod-sunod nga operasyon sab ang gihimo sa kapolisan kagahapon sa kadlawon nga niresulta sa pagkasikop sa tulo ka tawo, usa niini tigbaligya og shabu.

Unang operasyon nahitabo didto sa Purok Mahigugmaon, Barangay Tabunok mga 1:22 sa kadlawon ug nasikop si Vincent Nava Castañeda alyas Carlo 27, taga sitio Bato, Barangay Ermita, Syudad sa Sugbo.

Nadakpan siya pinaagi sa buybust operation ug nakuhaag shabu nga nitimbang og 20 gramos nga gibana-banang balor nga P136,000.

Mga alas 2:35 sa kadlawon, nadakpan si Jumar Lopez Panilagao, 46 anyos, usa ka parking boy didto sa Purok Pedro, Barangay Tabunok. Nakuhaan siya og shabu nga nitimbang og 0.3 gramo nga adunay gibana-bana nga balor nga P2,040 ka pesos.

Nasikop sab si John Lawrence Rumaguera Flores, 29 anyos didto sa sitio Neighborhood, Barangay Tabunok mga alas 3:30 sa kadlawon. Nakuha kaniya ang shabu nga nitimbang og 5 gramos nga adunay gibana-bana nga balor P34,000 ka pesos.

Sa pikas bahin, moabot 30 ka mga tawo nga nalambigit sa illegal nga drugas ang nasikop sa kapulisan sa Central Visayas sa ilang usa ka adlaw nga Simultaenous Anti-Criminality Law Enforcement Operation kon SACLEO gikan sa alas sais sa buntag sa Enero 6 ngadto sa alas sais sa buntag Enero 7, 2025. Rowena Capistrano, Gabriel Bonjoc ug Romeo  T.  Limpangog/IBM BANAT NEWS