Umagad nga nidaob sa ugangan gikasohan na

CEBU, Philippines — Gipasakaan na og kaso kagahapon ang suspek nga nidaob sa 84-anyos nga lola samtang nanglaba sa Sitio Cambuntan, Barangay Bolinawan, Dakbayan sa Carcar niadtong Enero 5, 2025.

Kasong frustrated murder ang gipasaka sa kapolisan batok sa suspetsado.

Matud ni Police Staff Sergeant Japhet Saavedra nga ang complainant sa kaso  gilangkuban sa anak sa biktima ug duha ka witness.

Ang suspek nangayo og pasaylo sa iyang gibuhat ngadto sa biktima wala kini pasayloa ug gipasakaan og kaso.

Sayo pa, napaslot ang tibuok lawas biktima human kini daobi sa iyahang umagad nga lalaki samtang nanglaba.

Ang biktima mao si Lolita Lico-an, biyuda residente sa naasoy nga dapit samtang ang suspect mao si Ignacio Brade Tribunalo, 55-anyos, minyo, nagpuyo sa Pananghiusa Dos, Barangay Tunghaan, Lungsod sa Minglanilla ug umagad sa biktima.

Gikataho nga ang suspetsado kalit lang nibutho sa balay sa biktima ug nagbitbit og itom nga bag ug gikuha niini ang tumbler nga adunay sulod nga gasolina ug gibubo ngadto sa biktima dayon gisilaban.

Ang usa sa mga saksi nga si Chery May, hingkod ang panuigon mnitabang sa biktima ug gidala dayon nila kini ngadto sa Carcar District Hospital apan gi-refer sila sa Vicente Sotto Memorial Medical Center.

Giingong personel grudge ang hinungdan nga nabuhat sa suspetsado ang pagdaob sa iyang ugangan.

Samtang na-recover sa kapolisan ang mga ebidensiya sama sa itom nga shoulder bag, duha ka tumbler nga dunay sulod nga gamay nga gasolina, laing tumbler nga dunay sulod  nga usa ka litrong gasolina ug gamay nga plastic bottle nga aduna gihapoy sulod nga gasolina.

Gipalawoman pa sa kapolisan sa Dakbayan sa Carcar ang ilang imbestigasyon kalabot sa maong hitabo. BDB BANAT NEWS