CHD giawhag pagsuta kun igo ba ang gidaghanon sa medisina

CEBU, Philippines — Giaprobahan sa Cebu City Council ang resolusyon nga naghangyo sa Cebu City Health Department (CHD) nga mohimo og research ug survey aron masuta ang gidaghanon sa mga medisina sulod sa ilang hurisdiksyon aron malikayan ang bisan unsang kakuwang nga makahatag og risgo sa panglawas sa mga Sugbuanon.

Kini ang giaprobahan nga resolusyon ni Konsehal Rey Gealon atol sa regular session sa konseho niadtong Miyerkules, 22, 2024.

Atol sa diskusyon, si Konsehal Jose Lorenzo Abellanosa mipadangat og corollary motion, nga naghangyo sa CHD nga hatagan ang konseho og listahan sa mga medisina ug kinahanglan nga unahon kini panahon sa ting-ulan ug sutaon kun kini igo ra aron matubag ang mga panginahanglanon sa publiko.

Sa iyang resolusyon, gipahayag ni Gealon nga kini nga resolusyon naggikan sa bag-o lang nigawas nga international news diin gikataho nga ang mga kakulang sa medisina sa England anaa na sa critical level matod pa sa pasidaan sa mga pharmacist.

Ang laing citation sa parehas nga resolusyon naglakip sa 2023 article gikan sa World Economic Forum nga nagpadayag nga ang pipila ka mga nasud sa Europe, USA, ug Asia nakasinati sa kakulang sa medisina tungod sa lainlaing mga hinungdan.

Kini nga mga hinungdan naglakip sa mga lockdown sa COVID-19 nga "gilimitahan ang normal nga sirkulasyon sa mga seasonal bugs" ug miresulta sa pagkahuyang sa mga sistema sa immunity, nga misangpot sa mas taas-kaysa-normal nga pag-tumaw sa mga seasonal nga sakit nga gikataho nga miresulta sa pagtaas sa tinuig nga panginahanglan sa mga medisina.

“It is necessary that research and survey is conducted in Cebu City to determine the adequacy of medicine within the jurisdiction, in order to prevent any medicine shortage that could pose a risk to the health of Cebuanos,” mabasa sa tipik sa resolusyon.

Subay niini, giawhag dayon ni Gealon ang CHD sa pagpahigayon sa maong survey. — /MEL (BANAT NEWS)