MCWD: Mga pag-uwan sa Sugbu nakapadugang sa tubig sa mga dams

CEBU, Philippines — Ang Metro Cebu Water District (MCWD) nibutyag nga miarang-arang ang suplay sa tubig karon tungod sa walay hunong nga pag-uwan sa Sugbo human sa halos wala na silay mahatag nga tubig sa ilang mga giserbisyohang konsumidor tungod sa negatibong epekto  dala sa El Niño Phenomenon sa miaging mga buwan.

Kun dunay kanihit sa tubig sa miaging mga buwan, nakita na karon ang mga kalamboan sa mga dams sa MCWD dala sa bag-o lang nga pag-ulan matod sa tigpamaba niini nga si Minerva Gerodias.

Sa pakighinabi sa mga tigbalita, si Gerodias niingon nga ang ulan sa miaging duha ka semana nakahimo na og kausaban sa suplay sa tubig.

Sa detalye, ang supply sa tubig sa Compostela nga nakasinati og zero water production atol sa El Niño nibalik na sa “almost normal” nga 9,000 cubic meters matag adlaw, nas duol sa orihinal nga kontrata sa supply niini nga 10,000 cubic meters kada adlaw.

Ang Lusaran Dam nga nikubos maayo ang tubig atol sa El Niño nga 3,500 cubic meters kada adlaw gikan sa 22,000 cubic meters kada adlaw.

Sa bag-o lang nga pag-ulan, si Gerodias niingon nga nibalik na sa 19,000 cubic meters matag adlaw ang produksiyon niini.

Ang Lusaran Dam maoy naghatag og sa tubig sa mga dapit sa Lahug, Busay, ug Apas.

Ang Jaclupan Dam kansang normal nga produksiyon sa tubig anaa sa 30,000 cubic meters matag adlaw, karon mitaas ngadto sa halos 15,000 cubic meters matag adlaw nunot sa pag-us-os niini sa 6,500 cubic meters matag adlaw.

“Ma feel na ni sa mga taga South nga naay gamay nga improvement ilang water supply,” matud ni Gerodias.

Apan sa Buhisan dam, si Gerodias niingon nga bisan sa pag-ulan, nagpabilin nga zero ang suplay sa tubig gikan niini.

Matud niya ang dam wala pa makatigom og igong gidaghanon sa tubig aron makasuplay sa mga konsumidor.

Sa pagkakaron, si Gerodias nagkanayon nga nagpaabot na lang sila sa pagsaka sa lebel sa tubig niini aron masugdan na usab ang pag-apod-apod.

“Di man na ma totally ug ang Buhisan kay naa man siyay gagmay nga spring sa kilid, pero di sad siya makasaka og daghan but as of now, katong uwan sa bukid. wala pa sya moagi sa mga tributaries aron mosulod siya sa Buhisan, wala pa siya, zero pa gyud sya didto,” matud ni Gerodias.

Apan siya miingon nga ang Buhisan dam nakubkob na aron mapalawman ug maandam na kung motaas na og balik ang level sa tubig.