Paalam mainit ang simula sa Olympic qualifiers
MANILA, Philippines — Mainit na sinimulan ni Tokyo Olympics silver medalist Carlo Paalam ang kampanya nitong makahirit ng tiket sa Paris Olympics.
Inilampaso ni Paalan si Alexie Lagkazasvili ng Greece sa first round sa pamamagitan ng unanimous decision win sa 2nd World Olympic Qualifying Tournament sa Bangkok, Thailand.
Pumabor ang lahat ng mga hurado sa Pinoy pug para masiguro ang tiket sa susunod na round ng men’s 57kg class.
Mangangailangan si Paalam na tumapos sa ikatlong puwesto na magbibigay sa kanya ng return ticket sa Olympics.
Bigo si Paalam na makapasok sa Paris Games sa unang dalawang qualifying tournaments sa 19th Asian Games sa Hangzhou, China noong nakaraang taon, at sa 1st World Olympic Qualifying Tournament sa Busto Arsizio, Italy noong Marso.
Natalo si Paalam sa quarters ng Asian Games habang nagtamo si Paalam ng injury sa 1st World Olympic Qualifying Tournament sa laban nito kontra kay Mexican Andrey Bonilla.
Magtatangka rin sa qualifying tournament sina Rogen Ladon, Criztian Pitt Laurente at Hergie Bacyadan.
Haharapin ni Ladon si Rafael Serrano Lozano ng Spain sa men’s 51kg class round habang aariba naman si Laurente kontra kay Mukhammedsabyr Bazarbay Uulu ng Kazakhstan sa men’s 63.5kg.
Sasabak naman si Bacyadan kontra kay Dunia Martinze ng Spain sa women’s 75kg.
Kailangan ni Ladon na makapasok sa Top 4 habang Top 5 naman sa dibisyon ni Laurente para makapasok sa Paris Games
Sa grupo ni Bacyadan, Top 4 din ang mabibigyan ng tiket sa Paris.
- Latest
