Polis hubog nangulata, nanion

CEBU, Philippines — Nabalhog sa prisuhan sa Guadalupe Police Station 9 Cebu City Police Office ang usa ka 31-anyos nga lalake nga aktibong polis human kini gireklamo kay giingong nanion og armas, nangulata ug nanghulga sa usa ka sibilyan nga silingan nila sa Barangay Sapangdaku, Dakbayan sa Sugbo kagahapon sa kadlawon.

Ang gidakop nga polis  kansang pangalan wala una ibutyag nag-ranggo og Police Corporal, 31 anyos, minyo, nagpuyo sa Sitio Arcus, Barangay Sapangdaku ug aktibong miyembro sa PNP ug nadestino sa Police Station 3 Mandaue City Police Office.

Samtang ang biktima mao si alyas Nerson, 32. Sa impormasyon sa Guadalupe Police Station 9 giingong hubog ang maong polis ug nagmaoy.

Gipangutana matud pa sa suspek ang biktima kay gipangita niini ang iyahang barkada.

Apan tungod kay gadali ang biktima nilakaw kini apan nasuko ang maong polis ug didto na kini giingong gikulata, gitionan og armas ug gibaharan.

Tungod sa maong insidente nidangop ang biktima sa police station nga miresulta sa nga gidakop ang suspect.

Ang inisyal nga kasong ipasaka batok sa maong polis mao physical injury, samtang gisusi pa kung unsa pang ubang mga kasong kriminal ug administratiba ang iyang atubangon.

Gikompiskar usab ang iyang PNP issued firearm sa dinakpan.

Niadtong adlaw nga Lunes, usa ka polis sab nga nadestino gihapon sa Mandaue City ang nadakpan sa buybust operation nga gihimo sa kapolisan gikan sa Police Regional Office 7 diha sa Barangay Mambaling, Cebu City. (BANAT NEWS)