Habagat masinati karong semanaha

CEBU, Philippines — Masinati karong semanaha ang southwest monsoon o habagat nga nagdala og hinay ngadto sa kasarangan nga pag-ulan sa pipila ka bahin sa nasud.

Matud ni Jhomer Eclarino, weather specialist sa Philippine Atmospheric, Geophysical and Astronomical Services Administration (PAGASA)-Mactan nga karong semanaha taas ang kahigayonan nga makasinati og pag-uwan ug hinay nga panugdog gumikan sa habagat.

Gibana-bana nga hinay ngadto sa kasarangang pag-uwan ang masinati ug adunay posibilidad nga mokusog kini sa mosunod nga mga adlaw.

Mapanganurong kalangitan inubanan sa panugdog ang masinati usab gumikan sa moisture nga dala sa hanging habagat ug magdala kini og kusog nga uwan nga posibleng hinungdan sa pagbaha ug pagdahili sa yuta.

Sa pagkakaron, walay na-monitor nga low pressure area apan adunay nabantayan nga bagyo gawas sa Philippine Area of Responsibility (PAR) ug ubos ang kahigayonan nga makasulod kini sa PAR ug wala kini direkta nga epekto sa bisan asang bahin sa nasud. Christyll Y. Tecson (BANAT NEWS)