Bercede nisaad nga mosuporta sa administrasyon ni Ouano’

CEBU, Philippines — Gipaniguro ni Mandaue City outgoing-mayor ug vice mayor-elect Glenn Bercede nga iyang suportahan ang mga programa ug proyekto nga gitinguhang ipatuman sa administration ni mayor-elect Thadeo "Jonkie" Ouano.

Si Bercede nagkanayon nga naglakip sa iyang suportahan ang programa sa edukasyon ug panglawas sa mga Mandauehanon.

Matud ni Bercede nga bisan ang mga proyekto sa imprastraktura ug uban pa iyang hugot nga suportahan kon ang katuyoan alang sa kalamboan sa siyudad.

Ug sa iyang pagdumala unya sa konseho iyang paningkamutan ang hapsay nga pagpadagan ug ang pagsinabtanay alang sa gitinguhang kalamboan.

Gipadayag ni Bercede nga naandan na sa mga sakop sa konseho nga mahitabo ang panaglalis sa mga higayon nga magkasumpaki ang mga baroganan sa usa’g usa ug nagpakita kini sa pagpatigbabaw kanunay sa demokrasya diha sa konseho. Ang maong panaglalis wala magpasabot nga mosangko sa panag-away kon ang katayoan mao ang pagtin-aw nga moresulta sa kaayohan sa mga Mandauehanon nga ilang giserbisyohan.

Dugang ni Bercede nga silang tanan nga nagtinguha sa paghupot sa katungdanan adunay tumong nga mao ang sinsiro nga pagsirbisyo sa mga Manda-uehanon. (BANAT NEWS)