Kamatayon sa call center agent walay foul play

CEBU, Philippines — Walay foul play ang kamatayon sa usa ka 28 anyos nga lalaki nga giingong milayat gikan sa 18th floor sa usa ka condominium sa Barangay Banilad, Siyudad sa Mandaue alas 5 pasado ang takna sa buntag niadtong Domingo, Hunyo 22, 2025.

Suma pa ni Police Lieutenant Colonel Mercy Villaro, tigpamaba sa MCPO nga nag-inusara lamang ang maong lalake sa giukopar niining lawak sa nahisgotang condominium.

Dugang pa ni Villaro nga ilang nasayran gikan sa mga kauban sa 28 anyos nga hilabihan kini kahilumon ug wala kini mosulti og problema ngadto sa iyang mga kauban sa trabaho.

Nasayran nga nailo na sa iyang mga ginikanan ang biktima ug ang iyaan na lamang niini nga gikan pa sa laing probinsiya ang ilang nahinabi ug wala usab kini masayod sa gihambin niini nga problema.

Si Villaro miingon nga sa footage sa CCTV sa maong condominium maoy ilang nakita nga daw nakainom og ilimnong makahubog ug nag-inusara lamang sa pagsulod sa giukopar niining kuwarto sa nahisgotang condominium.

Pipila lang ka gutlo ang nakalabay nakita sa footage sa CCTV camera nga kalit kining milayat gikan sa 18th floor sa condominium nga maoy nahimutangan niini. (BANAT NEWS)