Labella: Walay Sinulog sa Lalawigan karong Sinulog 2025

CEBU, Philippines — Gibutyag ni Sinulog Foundation Inc. Executive Director Elmer “Jojo” Labella nga walay ipahigayon nga Sinulog sa Lalawigan karong Sinulog 2025.

Ang mga mosalmot sa maong kalihokan lahos na nga mosalmot sa Sinulog Grand Parade nga ipahigayon karong Enero 19, 2025 diha sa Cebu City Sports Center.

Naandan na nga ang kalihokan nga aduna gyud kini palahi nga adlaw sa pagpahigayon niini diin mopasundayag ang nagkadaiyang contingent gikan sa nagkadaiyang local government units lukop Probinsya sa Sugbo.

Apan sa tuig 2025 hulipan kini ngadto sa brass band competition diin mao kini ang bag-ong kalihokan alang sa pagsaulog sa 2025 Sinulog Jubilee Year.

Ang brass band competition ipahigayon sa Enero 11, 2024 ug magsugod kini sa alas 2:00 sa hapon nga manukad diha sa dalan M. Velez ug moagi kini sa Cebu Provincial Capitol paingon na sa Osmeña Boulevardd ug Fuente Osmeña Circle ug matapos diha sa CCSC diin anha ipahigayon ang competition.

Gipadayag ni Labella ang rason nganong angay nga magpahigayon og brass band competition.

“This is fading away, as the brass band participants, those who played trumpets, trombones, flugelhorns... are already elderly”.

Alang kang Labella mas nindot usab kon adunay bag-ong tubo nga makapasundayag sa kahanas sa paggamit sa maong instrumento diin makahatag usab kini og dugang kinabuhi sa huni sa Sinulog. —/BDB (BANAT NEWS)