Opisyales sa City Hall, kapolisan gikasohan sa kampo ni Rama
CEBU, Philippines — Si Atty. Mikel Rama nikwestiyon sa pamahayag ni Cebu City Mayor Raymond Alvin Garcia nga naglaom na kini og daghang kaso nga ipasaka batok kaniya.
“Kung walay sayop nga gibuhat nganong mag-expect man ka nga adunay daghang kaso?”, pangutana ni Atty. Rama.
Sayo pa, si Garcia namahayag kini nga andam ug nagdahom na siya nga adunay daghan mga kaso nga ipasaka batok kaniya ilabi na nga nagsingabot eleksiyon.
Si Atty. Mikel kinsa maoy abogado sa iyang amahan nga si dismissed mayor Michael Rama nagkanayon nga kong si Garcia walay mga nahimong sayop ug kalapasan dili siya angay magpaabot og mga kaso nga ipasaka batok kaniya.
Matud ni Atty. Mikel, sila sa iyang mga kaubanan nga abogado padayon naglihok tungod kay ang dismiss ug disqualification order gikan sa Office of the Ombudsman alang sa iyang amahan ang wala pa ma-serve.
Ug nagpabilin pa gihapon nga local chief executive ang iyang amahan sa Dakbayan sa Sugbo.
Gikwestyon ni Atty. Rama ug Atty. Collin Rosell ang pagkatudlo ni Garcia pinaagi sa memorandum order nga giluwatan sa DILG.
Atol sa press conference kagahapon sa buntag uban ni Rosell ug Atty. Mikel gipahibalo usab nila ang patong-patong nga kaso nga ilang giduso ngadto sa Office of the Ombudsman-Visayas human sa pagkasikop ni Rosell niadtong Nobiyembre 8, 2024.
Ang gipasakaan og reklamo mao sila si Garcia, Police Colonel Antonietto Cañete, direktor sa Cebu City Police Office, City Administrator Kristine Joyce Batucan, hepe sa Waterfront Police Station ug uban pa.
Gitinguha ni Rosell nga mapahamtangan og silot ang mga gipangreklamo nga opisyales.
Ang mga gipasang-at nga kaso sa kampo ni Rosell mao ang unlawful arrest, physical injuries, arbitrary detention, grave threats, anti-child abuse act, grave misconduct, gross neglect of duty ug uban pa. (Rowena D. Capistrano/BDB) — (BANAT NEWS)
- Latest
