Drug personality sa Binaliw sikop sa buy-bust

CEBU, Philippines — Nadakpan sa Philippine Drug Enforcement Agency (PDEA)-7 ug Cebu City Police Station ang usa ka bag-ong identified nga drug personality atol sa ilang buy-bust operation kagahapon sa hapon diha sa Sitio Binaliw 1, Barangay Binaliw, Siyudad sa Sugbo.

Ang suspetsado mao si Joshua Villamor, 27-anyos, walay trabaho, nagpuyo sa naasoy nga dapit.

Nasakmit sa kapolisan gikan sa suspetsado ang duha ka putos nga shabu nga nitimbang og 100 gramo ug nibalor ngadto sa P680,000, buy-bust money, usa ka cellphone, motorsiklo ug ubang non-drug items.

Giingong ang suspetsado maka-dispose kini og 100 gramong shabu matag semana.

Sa laing bahin, gipalawman sa Police Regional Office-7 ang ilang imbestigasyon kalabot sa pagkasakmit sa P3 milyones nga balor sa illegal nga drugas dihang nihimo og buy-bust operation ang City Drug Enforcement Unit sa Dumaguete City Police Station sa Dumaguete City, Negros Oriental sa niaging adlaw.

Sayo pa, nadakpan sa kapolisan ang suspetsado nga usa ka 41-anyos nga lalaki nga taga Purok Mabugnawon 1, Barangay Junob, Dumaguete City.

Nasakmit gikan sa suspetsado ang P3.4 milyones nga balor sa ilegal nga drugas.

Samtang sa Lungsod sa Argao, usa ka 49-anyos nga lalaki ang nadakpan usab sa kapolisan sa lungsod sa atol sa ilang operasyon ngadto sa Sitio Payahan, Barangay Bogo sa maong lungsod. Ang suspetsado mao si alyas “Jr.”, residente sa naasoy nga dapit.

Nakuhaan kini og mga gagmay'ng putos sa shabu.

Base sa taho sa kapolisan nga ang suspetsado aron dili mailhan nagsul-ob kini og wig apan nasakpan gihapon kini sa kapolisan.

Sa laing bahin usab, gitutokan sa PDEA-7 ang kabahin sa drug money nga gamiton isip campaign funds.

Hinuon, gipasabot ni PDEA-7 Director Alex Tablate kon asa lang sila pwede mohimo og aksyon nga nasubay sa balaod didto ra usab sila kutob. BDB BANAT NEWS