Harris vs Trump sa US election karong adlawa

CEBU, Philippines — Usa ka adlaw sa dili pa ang U.S. 2024 presidential elections wala gihapon molurang ang higpit nga kompetisyon tali ni Democratic party presidential candidate  US Vide President Kamala Harris ug sa Republican party candidate kanhi US president  Donald Trump.

Sumala pa sa report sa Business Standard ug The Independent, ang higpit nga kompetisyon tali sa duha nagagikan sa Arizona, Georgia, ug Pennsylvania nga parehong mga gikonsiderar nga swing vote states, o walay kandidatong nidominar mao nga ang duha nag-ilog gyud pinaagi sa aktibo nga kampanya.

Kagahapon, Nobiyembre 4 mao ang katapusang adlaw sa pagpangampanya ug karong adlawa, Nobyembre 5, 2024 mao ang election day.

Samtang ang sayo nga pagbotar gisugdan na sa daghang mga estado, diin hapit 75 milyon ang nakabotar sa nangaging mga adlaw.

Si Harris, nga gi-endorso ni Presidente Joe Biden nakatutok sa panaghiusa sa mga Amerikano ug ug pagpadayon sa mga polisiya sa kasamtangang administrasyon nga nakatutok sa mga isyu sama sa pag-atiman sa panglawas, kalig-on sa ekonomiya, ug hustisya sa katilingban.

Sa iyang katapusang rally sa Michigan gihulagway kini nga "unity-focused" nga rally, wala siya manghinaway kang Trump kay gusto niyang isipon siyang "President for all Americans." Samtang sa rally ni Trump sa Georgia, North Carolina, ug Pennsylvania nipasiatab nga nga aksyonan niya dayon ang inflation rate sa nasud ug menusan ang pagapil-apil  sa US sa mga isyu sa ubang mga nasud.

Sa kataposang survey,  sikit kaayo ang duha kay gamay ra ang ligas sa labaw ni Harris nga 48 porsiyento sa 47 ni Trump sa national average mao nga importante para sa duha nga makombinsir kining swing vote states.

Si Harris dunay dakong suporta nga nakuha sa kababayen-an gikan sa mga taga Iowa.

Gipakita sa poll nga nabahin gyud ang mga botanteng Amerikano ilabi na may kalabotan sa mga polisiya sa duha bahin sa ilang ekonomiya. (BANAT NEWS)