Na-scam, peligrong mao pay mapriso

CEBU, Philippines — Gipadakop ang usa ka 52-anyos nga babaye human wala kini makabayad sa gipa-cash in nga kwarta sa duha ka tindahan sa may F. Cababug Street, Barangay Kasambagan, siyudad sa Sugbo Lunes sa hapon, Lunes, Oktubre 28, 2024.

Ang gipadakop mao si alyas Josie, 52 anyos,  residente sa Sitio Sagay, Barangay Kasambagan samtang ang mga reklamante mao sila si alyas Iris, 38 anyos ug si alyas Roe, 38 anyos nga taga Barangay Kasambagan ra sab.

Sa imbestigasyon sa Mabolo Police Station 4 sa Cebu City Police Office ang dinakpan miingon nga nakadawat matod pa siya og tawag sa nagpailang secretary sa usa ka sikat nga  host sa usa sab ka sikat nga TV game show.

Gisultihan matud pa siya nga siya nakadaog apan dili lang matod pa ipasaba kay basin mameligro iyahang kinabuhi maong i-sekreto lang.

Aron makuha matod pa iyahang daog ang dinakpan kinahanglan mopadala og P60,000 pinaagi sa online mobile wallet sa gihatag nga numero.

Pasado alas-10 sa buntag niadtong Lunes nagpa cash-in matud pa ang dinakpan og P30,000 kang alyas Iris ug nagpa cash-in sad kini sa tindahan ni alyas Roe diin unang gipa cash-in niini kay P12,000 ug gipadugangan niya og laing P10,000 maong niabot og P22,000.

Molakaw na unta ang dinakpan apan gipugngan ug gipaningil kung asa ang bayad apan giingong  daghan kaayo kini og estorya. 

Hangtud nga gidala ni alyas Roe ang dinakpan sa Mabolo Police Station ug niapas ang laing reklamante nga si alyas Iris.

Nangangkon matod ang dinakpan nga nailad sab siya ug mismo matud pa siya naglibog nga nakadaog siya apan nganong siya maoy gipapadala  og kwarta.

Giingnan pa niya ang nagpailang secretary sa tv host nga makig-istorya siya apan giingong giingnan siya nga dili makigestorya kay busy sa pagpangandam sa iyang kampaniya.

Wala magdahom ang dinakpan nga scam diay kini kay nalipay gyud gani siya nga siya nakadaog.

Gitug-an sab sa dinakpan nga usa ka post sa social media giingong iyahang gi-comment iyahang number.

Gusto sa mga reklamante nga mauli lang gyud ang kwarta aron dili mapasakaan og kasong estafa ang dinakpan.

Ang kapolisan daan ng nipasidaan bahin anang mga modus nga diin ilaron ang mga biktima nga nakadaog sa contest o raffle apan aron makuha ang premyo kinahanglang mopadala sila og kwarta sa gihatag nga numero aron maproseso ug mapadala ang ilang mga premyo. IBM BANAT NEWS