Notadong scammer nasikop sa CIDG Mandaue City Field Unit
CEBU, Philippines — Nadakpan niadtong Martes sa kapolisan sa Criminal Investigation and Detection Group (CIDG) Mandaue City Field Unit diha sulod sa usa ka subdivision sa Dakbayan sa Talisay ang usa ka lalaki nga nag-atubang og mga kasong estafa.
Ang suspetsado mao si alyas “Reynante”, 42-anyos, walay trabaho, kasamtangan nga nagpuyo sa usa ka subdivision sa Dakbayan sa Talisay nabutang isip top 8 most wanted person provincial level. Ang CIDG Mandaue City Field Unit niimplementar sa duha ka warrant of arrest sa kasong estafa batok sa suspetsado.
Ang unang warrant of arrest niini giisyu ni Judge Pacifico Tan Cimafranca, Jr. sa Municipal Trial Court in Cities, Branch 1, Pagadian City, Zamboanga del Sur penetsahan kini niadtong Marso 23, 2023 nga dunay girekomendar nga piyansa nga P72,000.
Laing warrant of arrest nga giisyu ni Judge Maria Rowena Socrates sa Branch 1, Municipal Trial Court in Cities Puerto Princesa 4th Judicial Region ug adunay piyansa nga P18,000.
Matud ni Police Captain Nigel Sanoy, hepe sa CIDG Mandaue City Field Unit nga usa ka notadong scammer ang suspetsado diin daghan kini og nabiktima sa mga lain-laing lugar sa nasud. Gani aduna kini nabiktima sa Masbate nga nakahatag og P750,000 bugti unta sa barge nga abangan aron kargahan sa graba ug balas apan pag-abot sa adlaw nga gamiton na unta ang barge walay niabot ug dili na ma-contact ang suspetsado.
Laing insidente usab mao nga nag-deal ang suspetsado og computer sets ug dihang nadawat na niya ang kwarta dili na usab kini ma-contact.
Gibutyag usab sa mga biktima kinsa wala na magpahingalan nga gibaharan pa sila sa suspetsado gumikan kay ilaha kining gipaningil.
Giingong online ang transaksiyon sa suspetsado diin magpakita kini og mga credentials, pictures kuyog ang mga politiko ug ubang iladong tawo aron mosalig ang biktimahon niini ug makompleto ang transaksiyon. Nasayran nga dili lang ang CIDG Mandaue City Field Unit ang nangita sa suspetsado lakip na ang laing unit apan idlas kini tungod kay magbalhin-balhin og puyo aron dili matultolan. (BANAT NEWS)
- Latest
