Lima sikop sa managlahing buy-bust operation

CEBU, Philippines — Lima ka mga illegalista ang nadakpan sa managlahi nga operasyon sa Carbon Police Station 5 ug Talamban Police Station 8 sa Cebu City Police Office(CCPO).

Nadakpan sa buy-bust operation sa Carbon Police Station 5 sa sitio Kawit, Barangay Ermita sila si Delia Genolos Sabanal alyas Delia, 62 anyos, residente sa sitio Ermita Proper, ug Marivec Patalinghug, 51 anyos, nagpuyo sa Barangay Pajac, dakbayan sa Lapu-Lapu.

Nakuhaan kini og 5 gramos sa gituohang shabu nga nagkantidad og P34,000.  Nasayran nga si Delia nadakpan na kaniadto gumikan sa kalambigitan sa illegal nga drugas ug siya maoy giingong supplier og illegal nga drugas ni Marivec.

Sa laing operasyon sa kapolisan nasikop usab si Joshua Aboyme Cartagenas alyas Jojo, 33 anyos, residente sa naasoy nga dapit ug kauban niini nga si Roland Macario, 45 anyos, nagpuyo sa Sitio Lawis, Barangay Mambaling.

Nasakmitan sila og 10 gramos nga drugas nga mobalor og P68,000.

Ang Talamban Police Station 8 sa ilang buy-bust operation sa Sitio Tapuko, Brgy. Pit-os, Cebu City nadakpan ang suspect nga si John Loui Tugado alyas Loui, 27 anyos, nagpuyo sa sitio Ouano., Brgy Guba.

Nakuhaan kini og 6 gramos nga shabu nga nagkantidad og kapin P40,000 ingon 9mm caliber revolver nga dunay duha ka mga buhing bala.

Samtang 66 ka tawo ang nasikop sa kapolisan sa Central Visayas sa usa ka adlaw nga operation sa Simultaneous Anti-Criminality Law Enforcement Operation kon SACLEO.

Nakasakmit sila og 482.21gramos sa shabu nga mobalor og P3,292, 614. (BANAT NEWS)