Garcia tinguha nga mahuman ang CCMC sa dili pa ang eleksyon

CEBU, Philippines — Gitinguha karon ni acting Cebu City Mayor Raymond Alvin Garcia nga mahuman na gayud ang Cebu City Medical Center tungod kay napulo na ka tuig nga wala pa kini matiwas.

Kini human niini nasayran nga katunga sa mga pasyente sa Vicente Sotto Memorial Medical Center mga taga Dakbayan sa Sugbo.

Ang maong tahu nasayran ni Garcia gikan sa Chief of Hospital sa VSMMC nga si Dr. Gerardo Aquino Jr.

Matud pa ni Garcia nga mas maayo nga mahuman na ang CCMC aron adto na modagan ang taga siyudad sa Sugbo alang sa ilang panginahanglan sa medical.

Tinguha sa acting mayor nga sa dili pa maabot ang piniliay sunod tuig mahuman na ang hospital hangtud sa ikanapulo ka andana.

Sa pagkakaron gihulma na ang CCMC Board of Directors aron maoy motan-aw sa pagpadagan, padulngan ug mga pamalaod sa tambalanan.

Gipadayag ni Garcia nga karong Oktubre ipahigayon ang bidding alang sa paghuman sa 4th ngadto sa 6th floor dungan sa pagtukod sa ika-walo ngadto sa ika-siyam nga andana sa CCMC. (BANAT NEWS)