Kataposang adlaw sa Comelec registration gidagsa

CEBU, Philippines — Gidagsa sa mga tawo ang kataposang adlaw sa registration nga gipahigayon sa usa ka mall sa north reclamation sa Dakbayan sa Sugbo kagahapon.

Nabantayan nga taas kaayo ang linya sa mga nagparehistro nga niapas sa deadline kagahapon.

Hinuon hapsay ra nga napahigayon ang registration tungod kay napangandaman na kini sa Comelec.

Samtang gipadayag sa last day registrants nga na-busy sila sa nakalabay’ng panahon maong wala sila nakaparehistro.

Si Omar Shariff Mamalinta, election officer sa Dakbayan sa Carcar nibutyag nga nidagsa sa ilang buhatan ang daghang tawo nga nagparehistro nga mga bag-o, transferee, nagpa-reactivate ug nagpa-correction of entries.

Matud ni Mamalinta nga ilang gihimo sa nanglabay nga mga buwan ang intensive and massive information dissemination pinaagi sa nagkadaiyang media outlet lakip niini ang traditional ug social media.

Si Mamalinta nibutyag nga ang pagpahigayon sa Register Anywhere Program sa mga nagkadaiyang siyudad sama sa Mandaue, Lapu-lapu ug Cebu giimplementar aron sa pag-cater sa daghang aplikante.

Sa laing bahin, karon nga magsugod na ang pag-file sa certificate of candidacy alang sa 2025 mid-term national ug local elections si Acting Cebu City Mayor Raymond Alvin Garcia nipahimangno ngadto sa tanang empleyado sa kagamhanan sa Dakbayan sa Sugbo nga motutok sa ilang mga trabaho bisan og managlahi ang partido nga gisuportahan niini.

Gipahinumduman usab ni Garcia ang mga empleyado nga ting-renew na usab sa employment contract alang sa mga casual and job order.

Nimando na si Garcia sa mga department head nga mosumiter na og lista sa mga empleyado nga dili na kinahanglan nga i-renew ilabi na kadtong mga wala na gyud mopatim-aw sa buhatan.

Nasayran ni Garcia nga bisan sa office of the mayor adunay mga empleyado nga wala motungha sa ilang trabaho diin hangtud karon wala magpahibawo sa rason sa wala na niini pagbalik.

Giklaro ni Garcia nga ang mga makapadayon sa pagtrababaho sa city hall mao kadtong mga girekomendar sa ilang department heads base sa ilang gipakita nga performance sa pagpangalagad ug dili basehan ang political affiliation niini. (BANAT NEWS)