911 Emergency Command Center gilusad

CEBU, Philippines — Gilusad na sa kagamhanan sa Dakbayan sa Sugbo ang 911 Emergency Command Center kagahapon, Septiyembre 30, 2024 nga anaa nahimutang sa wala nga bahin sa Legislative Building sa City Hall.

Ang dakbayan mao ang labing una nga local government unit sa tibuok Central Visayas nga modumala sa 911 Emergency Command Center u gang modumala niini mao ang Cebu City Disaster Risk Reduction and Management Office (CCDRRMO).

Ang blessing ug ang ribbon cutting gipanguluhan ni Acting Cebu City Mayor Raymond Alvin Garcia inubanan nila ni Konsehal Edgardo “Jaypee” Labella II, Konsehal Joel Garganera, Konsehal Jocelyn Pesquera, Renato “Junjun” Osmeña Jr., ug Department of the Interior and Local Government (DILG) Undersecretary Lord Villanueva.

Ang kagamhanan nakipagtambayayong sa Next Generation Advanced (NGA) kun diin mao kini ang mohatag og ekipo, training ug sistema alang sa pagsuporta sa pagpadagan sa 911 hotline system.

Tumong sa pagpatukod niining maong emergency command center mao ang dali nga pagtubag og mga  emerhensya, medikal, ug kalamidad sa 80 ka barangay sa syudad.

Gisaysay ni Garcia nga dili molapas P10 milyones ang gigahin nga pundo gikan Management Information and Computer Sciences (MICS) alang sa pagmuntar sa imprastraktura ug pagbutang sa mga gikinahanglan nga software.

Ang pangu sa CCDRRMO nga si Harold Alcontin miingon nga magtinabangay sila sa NGA alang sa pag-operate sa tibuok sistema pinaagi sa pagdawat og mga emergency calls gikan sa mga barangay.

Si NGA Country Manager Robert Llaguno misaysay nga ang 911 hotline sa Cebu City kaparehas sa 911 hotline sa Estados Unidos, mahibaw-an dayun ang lokasyon sa mga nanawag og tabang ug kung unsa nga tabang ang ilang gikinahanglan.

Kasamtangang nakipag-coordinate ang NGA sa nagkadaiyang telecommunication companies para niini.

Paningkamutan nila nga makaabot kini sa bukirang bahin sa siyudad diin sayod sila nga adunay mga dapit nga hinay o walay signal.

Nakig-alayon na sila sa mga ahensya sa gobyerno lakip na ang Bureau of Fire Protection ug Philippine National Police. (BANAT NEWS)