Lima ka balay naugdaw, P3M ang danyos

CEBU, Philippines — Mokabat  sa P3 milyones  ang gibiling danyos sa nahiabong sunog sa lima ka mga balay sa Sitio Sto.  Niño sa Barangay Basak, Siyudad sa Lapu-Lapu nga nahitabo  sa miaging Domingo  sa gabii Septiyembre 29, 2024.

Sa pasiunang pakisusi gihimo ni Fire Officer 3  Jopet Obina, field investigator sa  kabomberohan sa Siyudad sa Lapu-Lapu maoy nahibaw-an nga nagsugod kini sa abohan  sa usa ka panimalay nga naugdaw.

Dali kining nikatap sa mga silingang kabalayan nga pulos ginama sa mixed materials.

Hingpit kining napawong alas 11:01 sa gabii. Ang mga nasunogan gipahiluna diha sa Bag-ong Kababayen-an Office sa Barangay  Basak sa maong siyudad.

Si Basak Captain Jasmin Chan niawhag karon sa publiko sa paghatag og donasyon ngadto  sa mga biktima. Walay naangol o kinabuhing nakalas atol sa maong hitabo. (BANAT NEWS)