P3.2 milyong ayuda  sa DOLE sa mga nawad-an og trabaho

CEBU, Philippines — Nihatag ang Department of Labor and Employment (DOLE-7) og P3.2 milyones alang sa livelihood starter kits (LSKs) ngadto sa mga mag-uuma, tindero/tindera, ug ubang mga trabahanteng nawad-an og trabaho sa dakbayan sa Sugbo.

Personal nga gitunol ni DOLE-7 Regional Director Lilia A. Estillore ang tseke ngadto sa Cambinocot Multi-Purpose Cooperative – ang accredited co-partner (ACP) nga maoy magdumala sa pag-canvas ug pagpalit sa mga butang, ingon man sa pag-liquidate sa pundo ug pag-monitor sa maong livelihood projects.

Lakip sa gipanghatag mao ang mga jig, materyales ug ekipo nga gikinahanglan sa ilang tagsa-tagsa ka livelihood projects diin ang matag package nagkantidad ug kapin kun kulang sa PHP30,000.00.

Kadaghanan sa mga benepisyaryo mao ang mga mag-uuma, tindero/tindera, online sellers, ug mga trabahanteng nawad-an og trabaho sama sa kanhi security guard, bakery assistant ug electrician.

Pipila sa mga proyekto sa panginabuhian mao ang backyard hog raising; rice retailing; Sari-Sari store; peanut selling; furniture-making; ug fresh dressed chicken selling.

Alang sa hog raising, makadawat ang mga benepisyaryo og mga baktin, starter feeds, grower feeds, vitamins, ug dewormer. Si Estillore malaumon nga makatampo sila sa sikat nga industriya sa letchon sa Cebu.

Bahin sa rice retailing, si Estillore nitambag sa mga retailers nga ampingan ang 50 ka kilo nga sako sa bugas, mga timbangan, taksanan sa bugas, plastik nga mga drum, ug bag nga ilang madawat, uban sa usa ka tuig nga allowance sa transportasyon, human makompleto ang proseso sa pagpalit.

Alang sa mopili og Sari-Sari Store makadawat sila og mga items para sa pagbaligya, samtang ang mga mosulod sa Furniture-making makadawat og bench grinders, portable mini-polisher machine, wood cutter, hingers, ug uban pa.

Ang mga nagbaligya og mani makadawat og salted peanuts, kerosene stove nga adunay burner, ug usa ka tuig nga allowance sa transportasyon, samtang ang mga nagbaligya og fresh dressed chicken makadawat sa tanang kinahanglanon para sa proyekto, lakip na ang mga timbangan ug plastik nga mga bag.

Si Patricio L. Damaolao ug ang mga myembro sa Board sa Cambinocot Multi-Purpose Cooperative nagsiguro sa DOLE-7 nga ilang pangitaon ang mga kasaligan nga provider alang sa mga benepisyaryo sa mga proyekto sa panginabuhian ug maghatag og insentibo sa mga malampusong negosyo. Ang unang batch sa benepisyaryo gikatakda nga makadawat sa tanang materyales ug ekipo karong Agosto 20, samtang silang tanan masakop usab sa group personal accident insurance (GPAI) pinaagi sa GSIS sulod sa usa ka tuig. (BANAT NEWS)