Kahibalo sa crime solution maoy gipangita ni Garcia

CEBU, Philippines — Usa sa gipangita ni acting Cebu City mayor Raymund Alvin Garcia sa opisyal nga modumala sa Cebu City Police Office mao ang kaalam sa opisyal sa paghimo og mga solusyon batok krimen, mao kini ang iyang gipahibalo sa bag-ohay lang milingkod nga officer-in-charge sa maong buhatan.

Adunay lima ka mga pangalan nga gipapilian kaniya sa National headquarters sa Philippine National Police (PNP) aron maoy molingkod sa CCPO isip pangulo sa kapolisan sa dakbayan.

Matud pa niya, ang iyang kamandoan mao ang pagpangita og mga solusyon aron mapugngan ang bisan unsang matang sa krimen dinhi sa siyudad.

Kini human sa sunodsunod nga insidente sa pagpamusil nahitabo sa dakbayan niadtong Biyernes, Agosto 2, 2024.

Nianang adlawa, tulo ka insidente sa pagpamusil ang nahitabo, duha sa mga biktima ang namatay samtang laing duha ang naangol.

Sa iyang unang pakighinabi kang OIC City Director Police Colonel Antonieto Cañete, giingnan niya kini nga “prevention is better than cure” mao nga karon daghan nang makitang mga polis sa kadalanan.

"But it seems like naa gyud mga isolated cases nga mga ingon ani. We will get to the bottom of this kay mahitabo man gyud ning ingon ani, ang importante kay mapangitaan nato og kasulbaran," matud ni Garcia.

“Mao ng wala gyud nako gi-recommend for permanent position si Colonel Cañete kay kinahanglan man ta nga mopili og tarong nga personnel dinhi sa atong peace and order dinhi sa atong dakbayan sa Sugbo,” dugang pa niya.

Ang pagtudlo ni Cañete isip opisyal nga CCPO Director sa dakbayan nagpabilin nga dili pa sigurado tungod kay matud pa ni Garcia ang iyang suporta alang sa kalinaw ug kahusay maoy magpatigbabaw.

Iyang nahisgutan ang giunsa ang gihimong mga preperasyon para  sa seguridad sa usa ka semana nga pag-host sa sa dakbayan sa Palarong Pambansa 2024 nga diin dako og positibong epekto kay nimenus gyud ang krimen adtong mga panahona. Sa wala pa gasugod ang Palaro, gitugyan sa Cebu City Government ang mga donated nga patrol cars, armas, ug mga bala ngadto sa CCPO isip pagpakita sa suporta sa dakbayan ngadto sa lokal nga kapolisan.

“So there is no reason that they cannot fight criminalities,"matud pa ni Garcia.

Wa hinuon matago ni Garcia ang iyang "pagkadismaya" sa panghitabo karon mao nga gusto niyang  pakigtagboan ang kapolisan aron ipresentar kaniya ang kasamtang sitwasyon sa peace and order sa dakbayan. Gitug-an ni Garcia nga sa lima ka mga pangalan nga gipapilian kaniya, nalakip didto kadtong mga personal nga miduol kaniya ug kadtong  mga girekomendar kaniya.

 Hinuon matud niya nga wala siyay personal choice sanglit kinahanglan pa niyang tan-awon ang track records kada usa nila. Giangkon hinuon niya nga naapil sa listahan si Cañete. Si Cañete milingkod sa katungdanan isip OIC City Director sa CCPO niadtong Hulyo 26 human gibalhin ngadto sa PRO-7 si Police Colonel Ireneo Dalogdog. (BANAT NEWS)