Mga motorsiklo dili paagion sa tunnel

CEBU, Philippines — Ang Cebu City Traffic Office (CCTO) nipahinumdom sa mga motorista sa pag-obserbar sa disiplina sa higayon nga mobyahe duol sa tunnel nga nag connect sa South Road Properties (SRP) kay sirado kini sa publiko tungod sa padayon niini nga rehabilitasyon.

Si Corazon Yrog-irog, Officer-in-charge sa Traffic Education Section niingon nga bisan wala pa sirad-i ang tunnel nagbutang na sila og mga signage ug warning signal alang sa mga motorista.

Niadtong Hulyo 18, 2024, gisirad-an ang SRP tunnel sa publiko alang sa rehabilitasyon niini diin ang mga motorsiklo o tulo ka ligid nga mga sakyanan dili na tugotan nga makasulod.

“Pero di gyud malikayan, very visible na gyud sa atong mga mata nga dako na kaayog signage nga ang motorcycle diri paagion sa ubos pero naa ra gihapoy nagdala og motorsiklo nga yano kaayong mosulod sa atong SRP tunnel,” matod pa ni Yrog-irog atol sa Traffic Hour nga segment sa Sugboanon Channel, usa ka broadcasting arm sa Cebu City Public Information Office.

Sa pagkakaron, nagpadayon pa ang rehabilitasyon sa tunnel. Sa samang programa, ang mga personahe sa CCTO dugang nipadayag nga bisan pa sa nagpadayong trabaho, ang mga motorsiklo mopili gihapon sa pagsulod sa tunnel ilabi na kon walay personnel nga magbantay sa maong dapit.

“Katong atong mga kaigsuonan nga nagdala og motorsiklo, para ra gyud sa inyong safety,” dugang pa niya.

Hinuon iyang giklaro nga bisan pa sa mga dili mutuman nga mga motorista, wala pay nahitabong aksidente sulod sa tunnel sukad nagsugod ang rehabilitasyon.

“Pero dili ta maghuwat. Or di nato paabuton nga naay ma disgrasya dinha nga nagmotorsiklo sa sulod sa tunnel nga ayha pa ta mutuman,” sigun niya.

Dugang pa niya nga ang pagsira gipaluyohan sa usa ka resolusyon nga naglakip sa pagbutang og temporaryong warning signages aron pagpahinumdom sa mga motorista nga moagi.

Gikataho nga, si Attorney Kent Jongoy, Assistant Head sa CCTO miingon nga aduna nay diversion route gikan sa Southern ug Northern end nga mo-cater sa tunnel rehabilitation.

Matud ni Jongoy, partial road closure lang ang ilang gipatuman sa right-most lanes sa duha ka bounds sulod sa unom ngadto sa pito ka buwan.

Dugang niya nga ang rehabilitasyon pangunahan sa Department of the Public Works and Highways (DPWH) diin bahinon sa tulo ka component ang civil works. (BANAT NEWS)