Pagtukod og laing super family health center gisugyot

CEBU, Philippines — Gitan-aw karon ang pagtukod sa Super Family Health Center sa habagatan nga bahin sa dakbayan sa Sugbo pinaagi sa usa ka resolusyon sa konseho.

Mao kini ang gisang-at nga resolusyon ni Konsehal Rey Gealon, Chairman sa Committee on Laws and Styling sa Sangguniang Panlungsod nga tukion na sa sunod nga regular session.

Ang resolusyon ni Gealon nagtumong sa paghangyo sa Department of Health (DOH) Central Visayas nga magtukod ug Super Family Health Center sa habagatan, partikular na sa mga lugar nga daghan ang populasyon.

Niadtong Hulyo 1, 2024, and Cebu City Super Family Health Center sa Barangay Apas pormal ng gibuksan nga gipangulohan ni acting Mayor Raymond Alvin Garcia ug DOH-7 Director Jaime Bernadas.

Aduna kini comprehensive services sa pag-atiman sa panglawas. Ang bag-ong pasilidad magtutok usab sa mga importanteng programa sa gobyerno sa panglawas sama sa pagbakuna, nutrisyon, paglikay sa sakit, ug prenatal care.

Dugang pa, ang pasilidad aduna sab mga X-ray unit, ultrasound, botika, ug supply room.

“The opening of the Cebu City Super Family Health Center is incredibly commendable as it is a clear indication of the government's continuous efforts to provide quality healthcare to Filipinos, in general, and Cebuanos,” matud pa sa resolusyon ni Gealon.

Dugang pa, sa pag-abli sa Super Family Health Center sa Apas, gituohan nga dagsaon gyud kini sa tawo nga mopahimulos sa mga serbisyo ug muresulta sa pagtapok na hinuon sa usa ka lugar.

Ang hangyo nga magtukod og laing pasilidad sa south nga bahin tungod aron makadaginot ang mga Sugbuanon sa gasto sa transportasyon.

Ang Super Family Health Center sa Barangay maoy labing unang pasilidad sa Central Visayas.

Atol sa pag-abli niini, gisugdan na usab sa pasilidad ang pag-admit sa mga pasyente tungod kay aduna nay mga medical practitioner nga gipakatap aron sugdan ang operasyon.

Sa laing balita gihatagan ni Mandaue City Mayor Jonas Cortes og P5 milyones nga pinansiyal nga ayuda ang 51 ka Day Care Workers nga nadistino sa kabarangayan sa Siyudad sa Mandaue.

Suma pa ni mayor Cortes ang pinansiyal nga ayuda maisip lang nga pahalipay ngadto sa mga Day Care Workers nga nahimong instrumento sa pag umol sa kabataan nga mahimo nga malampuson sa ilang pagdaku. (BANAT NEWS)