Siyudad sa Sugbo nakadaginot sa paghost sa Palarong Pambansa
CEBU, Philippines — Gipadayag ni acting Cebu City mayor Raymond Alvin Garcia nga naka save ang Cebu City Government og P8 milyones sa pag-host sa Palarong Pambansa closing ceremony tungod kay giabaga ang gasto sa Cebu Provincial Government.
“At least naka save ang city og P8 million so the closing ceremony will actually shouldered by the Provincial Government of Cebu,” matud ni Garcia atol sa press conference kagahapon (Lunes), Hulyo 15, 2024.
Ang culminating event giingon nga tambongan ni Bise Presidente Sara Duterte kansang seguridad ug protocol nagpahigayon na og inspeksyon sulod na sa duha ka adlaw.
Matud ni Garcia, mahimong timailhan kini nga motambong ang VP apan giangkon nga wala’y direktang kompirmasyon gikan kaniya ang iyang pagtambong.
Giklaro ni Garcia nga ang mga tiket ipanghatag gihapon sa Cebu City Government. Hinuon siya nidugang nga pipila sa mga bahin niini ipang-apod-apod usab sa Probinsiya sa Sugbo tungod kay nitabang sab sila sa gasto sa closing ceremony.
“But I hope nga dili gyud ing-ana ka gubot,” matud ni Garcia.
Atol sa Flag raising ceremony kagahapon, si Garcia namulong sa mga empleyado sa Cebu City Hall ug niawhag nga dili mokampante kay nangandam na sila sa pagsira sa Palaro.
Gidayeg usab niya ang paningkamot sa matag empleyado nga nakatampo sa lakaw sa siyudad sa tibuok proseso sa pag-host sa pinakadakong sporting event sa nasud. (BANAT NEWS)
- Latest
