Duha patay sa pagpamusil

CEBU, Philippines — Upat ka mga insidente sa pagpamusil ang natala sa siyudad sa Sugbo ug sa Talisay niadtong Lunes, Agosto 19 ug Martes, Agosto 20, 2024 nga niresulta sa kamatayon sa duha ka tawo ug pagkaangol sa laing duha.

Niadtong Lunes, pasado alas 7 sa gabii, gipusil patay ang usa ka wala pa mailhing lalake nga gibana-banang nag edad og 30 anyos ug nagsul-ob og itom nga t-shirts, gray ug brown bullcap ug faded blue long pants.

Sa impormasyon nga nakuha Inayawan Police Station dunay kaestoryang tawo sa lugar ang biktima sa wala pa kini gipusil. Aduna say nakuhang illegal nga drugas sa bulsa niini.

Dayon pagka alas 12:15 sa tungang gabii kagahapon, gipusil sab ang 34 anyos nga si alyas Leon sa Sitio Laguna, Barangay Sambag 1 ning siyudad.  Ang biktima nagpuyo sa Barangay Pahina Central.

Base sa impormasyon sa Abellana Police Station 2, sa wala pa ang pagpamusil naglalis biktima ug ang asawa niini labot matod pa sa third-party. 

Giingong nidagan sa Sitio Laguna ang asawa ug gisundan kini sa biktima apan pagabot sa lugar gipusil ang biktima og usa ka wala mailhing lalake nga nagbarog sa daplin sa dalan.

Naigo kini sa wala nga dughan, wala nga batiis ug tuo nga kamot. Dali sab nga misibat ang mamumuno.

Gitubag kini og laing pagpamusil sa kaadlawon sa Sitio Lawis, Alaska, Barangay Mambaling diin usa ka alyas Racal ang gipusil sa duha ka mga lalaki nga niresulta sa kamatayon niini.

Ang Cebu City Police Office (CCPO) mimando sa mga police stations diin kini nahitabo nga pangitaon ug dakpon ang mga gikatahapan.

Giklaro hinuon nga dili kini patara lang og pamusil ni bisan kinsa ang mga kriminal kondili mga tawong adunay atraso kanila.

Sa pikas bahin, naangol human gipusil ang 53 anyos nga babayeng tindera og buko juice diha sa sitio Rattan, Barangay Tanke, Dakbayan sa Talisay niadtong Lunes sa hapon. Ang biktima nagestambay diha sa basketbolan sa dihang kalit kining gihunongan og nagmotor ug gipusil sa iyang buko-buko ug kilid sa lawas hinungdan sa pagkalandig sa tambalan. Nakuha sa crime scene ang basiyo sa bala sa .45 pistola.

Ang kapolisan nagduda nga ‘mistaken identity’ ang biktima kay pirme kining nga magpurong. – IBM BANAT NEWS