P7.3M shabu sakmit, nakasuyop naglatay-latay sa atop na-rescue

CEBU, Philippines — Nadakpan sa operatiba sa Provincial Drug Enforcement Unit/Provincial Intelligence Unit sa Negros Oriental Police Provincial Office (NOPPO) ang suspetsadong high value individual ug nasakmitan kini og shabu atol sa ilang buy-bust operation ngadto sa Purok San Sebastian, Barangay Buntis, Lungsod sa Bacong, Negros Oriental sa niaging adlaw.

Ang nadakpan usa ka 45-anyos nga lalaki, residente sa Dumaguete City sa maong Probinsiya.

Nasakmit sa kapolisan gikan sa suspetsado ang 1,085 gramo nga shabu nga nikantidad ngadto sa P7.3 milyones ug drug paraphernalia.

Si Police Brigadier General Anthony Aberin, direktor sa PRO-7 nidayeg sa personnel sa PDEU/PIU NOPPO sa malampusong pagdakop sa high-value individual ug pagsakmit sa dakong kantidad nga drugas.

Sa laing bahin, na-rescue niadtong Martes sa gabii ang usa ka 22-anyos nga lalaki kinsa naglatay-latay diha sa atop sa mga kabalayan sa Sitio Catalina, Barangay Lahug, Siyudad sa Sugbo diin nakapabalaka kini sa mga residente.

Ang na-rescue mao si Daryl Siasico Eguia, nagpuyo sa Sitio Kawayan, Barangay Lahug niining siyudad.

Si Eguia ang ubos karon sa kustodiya sa Mabolo Police Station sa Cebu City Police Office (CCPO) human kini na-rescue sa mga personnel ss Bureau of Fire Protection Emergency Medical Services (BPEMS).

Si Eguia moambak unta kini tungod kay gustong magkutlo sa iyang kinabuhi.

Si Eguia kinsa wala sa hustong kabuot niangkon ngadto sa mga tigbalita nga nakagamit siya og shabu dihang naglatay-latay siya sa atop.

Gisusi karon sa kapolisan sa Mabolo Police Station ang background ni Eguia.

Kasong alarm and scandal ang gikatakdang ipasaka batok kang Eguia.

Samtang sa Dakbayan sa Talisay, lima ka suspetsadong drug addict ang nadakpan human sila naaktohan nga nanuyop og shabu diha sulod sa payag sa Sitio Kuazar, Barangay Cansojong, sa nahisgutang siyudad niadtong Martes sa gabii.

Ang mga suspetsado mao sila si Roger Boltron, Antionio Empis, Jr., Edison Deiparine Joshua Baynos, Jr. ug Mark Anthony Segundo.

Si Police Lieutenant Colonel Epraem Paguyod, hepe sa kapolisan sa siyudad nibutyag nga ang ilang grupo sa Drug Enforcement Unit (DEU) nakadawat og impormasyon kabahin sa ilegal nga binuhatan diha sa lugar ug nasuta sa ilang pagpaniid nga nagtapok sa usa ka payag ang mga drug addict ug naaktohan nila kining nagsuyop og ilegal nga drugas.

Nasakmit gikan sa mga suspetsado ang 0.35 gramo nga shabu nga nikantidad ngadto sa P2,380. (BANAT NEWS)