Kapin usa ka kilong shabu nasakmit

CEBU, Philippines — Kapin sa usa ka kilo nga illegal nga drugas ang nasakmit sa mga operatiba sa Regiona Police Drug Enforcement Unit(RPDEU) sa Police Regional Office(PRO)-7 dihang nagpahigayon sila og buy-bust operation sa L. Tudtud Street, Barangay Mabolo, siyudad sa Sugbo  niadtong Lunes sa gabii, Septyembre 16, 2024.

Nadakpan ang subject sa operasyon nga si Kharl Jay Monterde Quinal alyas Ekid , 33, residente sa Holy Name Street, Barangay Mabolo ning siyudad.  Nakuhaan ang suspetsad og 1,200 gramos sa gituohang shabu nga nagkantidad og P8.1 Milyones.

Nasayran nga tulo ka semana nga gipaubos sa monitoring ang suspetsado human makadawat og impormasyon ang mg operatiba nga kini nalambigit sa pagpamaligya og illegal nga drugas.

Nahibaw-an sa kapulisan nga maka dispose kini og tulo ka kilong shabu kada semana dinhi sa Cebu City.

Samtang balik sa prisuhan ang usa ka High Value Individual human kini nakuhaan og mga drugas dihang gi-implementar sa Labangon Police Station 10 sa Cebu City Police Office (CCPO) ang search warrant niini sa kasong kalapasan sa Section 11, Article II sa Republic Act 9165 diha sa Sitio Kadasig Phase 3, Barangay Tisa, siyudad sa Sugbo, Lunes sa hapon, Septyembre 16, 2024.

Ang nadakpan mao si Jaric Yamasarez Sabaulan alyas Rey, 44. Ang Labangon Police Station 10 pinangulohan ni Police Major Eraño Regidor ni-implementar sa search warrant batok sa suspetsado nga gi-issue sa Regional Trial Court(RTC)-7, Branch 74, Cebu City tungod sa ilegal nga drugas.

Atol sa pagsiksik nakuhaan ang suspetsado og 50.65 gramong gituohang shabu nga nagkantidad og P344,420 hinungdan nga kini gidakop.

Nasayran nga nadakpan na kaniadto ang suspetsado gumikan sa kalapasan sa Section 5 ug 11, Article II sa Republic Act 9165 apan nakagawas kini sa miaging tuig pinaagi sa plea bargaining. – IBM BANAT NEWS