Ginagmay nga krimen ipasusi ni Garcia sa kapolisan

CEBU, Philippines — Gustong ipasusi ni Acting Cebu City Mayor Raymond Garcia kang Cebu City Police Office chief, P/Col. Antonieto Cañete ang mga “gamay” nga krimen” nga nahitabo dinhi sa siyudad karong bag-o lang.

Kini human ni-viral ang usa ka video niadtong niaging semana sa usa ka grupo sa mga mangunguot nga nibiktima sa usa ka manimbahay nga nagdagkot og kandila sa Basilica Minore del Sto. Niño.

 “Ang Cebu City bitaw maoy tunghaan sa mga criminal elements kay naa man gud diri ang daghang tawo. Mingaw ang ubang mga lugar so diri gyud sila mobuhat sa ilang criminal intention, like robbery,” matud ni Garcia pinaagi sa PIO sa siyudad.

 “Kaning naay mangunguot that’s a price we have to pay for being a highly urbanized city, but it is no excuse for the police not to do their jobs,” dugang niya.

Si Garcia, bisan pa nga nalipay sa presensya sa pulis sa syudad, nimando sa kapolisan nga hatagan og gibug-aton ang mga pampublikong lugar lakip na ang mga ampoanan.

 “You have seen that all around already in Cebu City, nga ang atong mga patrol cars nga walo ka buok are really going around, nagsige na og tuyok ilang mga wang-wang. So, I think we should also put emphasis on public places, not only the streets, on the roads… but also public places of worship, malls, etcetera,” nagkanayon si Garcia.

Sa sayo pa, gihimo usab ang usa ka simulation exercise sa dakbayan sa Sugbo sa Leon Kilat Street nga nimugna og kalibog sa pipila.

 “Akong mando man gud ni Col. Cañete is I don’t want this happening again ang pagtulis. So, it was really initiative ni Col Cañete, ni (City) Councilor Phillip Zafra nga i-specify gyud niya ang mga financial institutions, pawnshops, banks, etcerera,” suma pa sa acting mayor. “Gipangtapok niya, naay simulation, just so we can address particular problems, if ever, it (robbery) will happen again. Pro-active ang ilang gibuhat and I’m very happy nga nituman sila sa akong mando,” saysay pa ni Garcia.