Kaso batok sa kapitan sa Umapad giduso og balik sa Ombudsman
CEBU, Philippines — Giduso og balik ngadto sa Ombudsman Visayas sa committee on Good Government, Public Ethics and Accountability sa konseho sa Siyudad sa Mandaue ang reklamo ni Umapad Barangay Councilor Libertin Lumapas batok kang Umapad Barangay Captain Reb "Beboy" Cortes.
Si Lumapas nireklamo batok kang Cortes tungod sa giingong pagtudlo niini sa ikaunom nilang konsehal isip officer-in-charge dihang nilarga ang nahisgutang kapitan ngadto sa gawas sa nasud niadtong Abril 2024.
Ug gumikan niini, si Lumapas kinsa maoy numero unong konsehal sa barangay nipasaka og kasong grave misconduct, conduct unbecoming of public official and usurpation of authority batok kang Cortes.
Ang maong reklamo giduso ni Lumapas ngadto sa Ombusdan Visayas niadtong Hulyo 18, 2024.
Matud ni Lumapas nga si Cortes nakahimo og kalapasan sa Local Government Code sa pagtudlo sa lower-ranking barangay official isip OIC sa barangay nga nagsugod sa Abril 4, 2024 hangtud sa Abril 9, 2024.
Si Cortes nibiyahe ngadto sa Japan kuyog sa ubang mga kapitan sa kabarangayan sa siyudad.
Si Cortes nitudlo kang Konsehal Josefina Entrampas ug dili si Lumapas diin kalapasan kini sa Section 46 sa Akta Republika 7160 kun “Local Government Code of the Philippines” nga nagmando nga sa higayon nga incapacitated ang barangay kapitan kini ang gitugotan sa pagtudlo sa highest ranking councilor ug mo asumer kini sa maong position isip OIC. Ang maong reklamo ni Lumapas ang giduso sa Ombudsman Visayas ngadto sa konseho sa Siyudad sa Mandaue ug gitahasan sa pag-resolba niini.
Si Mandaue City Councilor Dante Borbajo, chairman sa Committee on Good Government, Public Ethics and Accountability sa ilang regular session niadtong Septiyembre 10, 2024 ang nipahibalo nga ilang ibalik ngadto sa Ombudsman ang maong reklamo sa pagresolba niini. (BANAT NEWS)
- Latest
