P150 gipangayo nga umento sa suhulan sa mga mamumuo
CEBU, Philippines — Giduso sa pipila ka labor groups ang P150 matag adlaw nga umento sa suhulan sa mga mamumuo atol sa gipahigayon nga public hearing sa Regional Tripartite Wages and Productivity Board RTWPB kagahapon diha sa may DepEd Ecotech Center, Barangay Lahug ning Dakbayan sa Sugbo.
Ang mga labor groups, representante sa nagkadaiyang stakeholders lakip ang business sector sa Metro Cebu uban ang miyembro sa RTWPB sa Central Visayas nagtigum alang sa unang public hearing bahin sa minimum wage adjustment ug wage reclassification. Gipaminaw sa wage board and sentimento sa mga concerned nga sectors ilabi na sa kahimtang sa mga mamumuo. Pipila ka labor groups nipresentar sa ilang position papers ug niduso sa ilang proposed nga P150 nga umento aron pagtabang sa mga trabahante nga maka recover sa ilang take-home pay.
Si Howell Villacrusis, representante sa Alyansa sa mga Mamumuo sa Sugbo-Kilusang Mayo Uno, nipadayag atol sa tigum nga gikinahanglan na nga dunay umento sa sweldo tungod sa nasinati sa mga trabahante nga kalisod tungod sa pagsaka sa mga palaliton.
Pipila sa mga employers ang dili pabor sa wage increase diin mipagawas usab sa ilang mga sentimento sama sa Mandaue Chamber of Commerce and Industry nga nisumiter ngadto sa wage board sa ilang opposition.
Ang Chairperson sa RTWPB-7 Lilia Estillore, kinsa mao usab ang director sa Department of Labor and Employment Central Visayas nibutyag nga aduna pay ipahigayon nga mga public hearings sa Balamban karong August 28; Bogo City August 30; September 3, Dumaguete City ug September 4 sa Tagbilaran City. MEL BANAT NEWS
- Latest
