DILG, Ombudsman gipatubag sa Korte Suprema

CEBU, Philippines — Gimandoan sa Korte Suprema si Ombudsman Samuel R. Martires ug Department of Interior and Local Government Secretary Benjamin Abalos, Jr. nga moduso sa ilang komentaryo kalabot sa petisyon nga gi-file ni suspended Cebu City mayor Michael Rama. Ang maong petisyon ni Rama mihagit sa section 24 sa Akta Republika 6770 o ang  Ombudsman Act of 1989 ug ang seksyon  O, Rule III sa Administrative Order No. 7 kun ang  Rules of Procedure sa Office of the Ombudsman, as amended.

Nalatid sa section 24 sa Akta Republika 6770 nga ang Ombudsman mamahimong mosuspenso sa usa ka opisyal o empleyado ubos sa hurisdiksyon niini samtang padayon ang imbestigasyon kun ang “judgement” sa Ombudsman lig-on ang ebidensya ug kun ang charge o kaso batok sa usa ka opisyal kalabot sa dishonesty, oppression o grave misconduct o neglect in the performance of duty.

Gikwestyon ni Rama ang unom ka buwang preventive suspension nga gipahamtang batok kaniya may labot pagbalhin sa mga opisyal sa Cebu City Assessor’s Office nga matud pa usa ka“constructive dismissal.”

Matud ni Rama nga kalapasan sa balaod ang paggamit sa section 24 sa Ombudsman Act ug section O, Rule III sa Rule of Procedure sa Office of the Ombudsman sa mga lokal nga opisyal sa gipili o na elect sama niya.

Gihangyo ni Rama ang Korte Suprema nga bakwion ang pagpahamtang kaniya og preventive suspension. Gihatagag napulo (10) ka adlaw ang Ombudsman ug DILG pagkomento sa petisyon ni Rama. – IBM BANAT NEWS