48 ka volunteers sa U.S. Peace Corps midangat dinhi sa nasud

CEBU, Philippines — Niabot na sa Pilipinas ang kwarentay otso (48) ka mga volunteers sa U. S Peace Corps alang sa duha ka tuig nga pagserbisyo isip suporta sa mga lokal nga programa sa nagkadaiyang lugar sa nasud apil na sa Sugbo.

Ang maong mga volunteers midangat niadtong Lunes Hulyo 8, ug sila motabang sa programa sa edukasyon, youth development ug pagpanalipod sa kalikopan diin sila ipadala sa lain-laing lugar sa Pilipinas sama sa Aklan, Antique, Batangas, Benguet, Bohol, Capiz, Iloilo, La Union, Nueva Ecija, Oriental Mindoro, Pampanga, Pangasinan, Tarlac ug sa Sugbo.

Mahimo sila nga kabahin sa mga programa sama sa mahimong magtutudlo sa English sa elementary ug high school; magsilbi nga facilitator sa youth development sa mga organisasyon nga gi-accredit o giila sa Philippine Department of Welfare and Social Development ug mosuporta sa lokal nga kagamhanan sa pag establisar og marine protected areas ug pagpatuman og coastal resource management nga mga plano.

“U.S. Peace Corps Volunteers come from all over the United States and represent the diversity of the American people.  They come with a variety of skills and experience to contribute during their service in the Philippines,” matud ni U.S. Ambassador MaryKay Carlson. Sa dili pa sila ipadala sa nagkadaiyang komunidad, ang maong mga volunteers ipaubos sa 11 ka semana nga pre-service training sama sa pagtuon sa teknikal, kultura ug mga pinulongan sa nasud sa dili pa sila ipadala alang sa ilang himoong serbisyo. Ang maong mga volunteers maoy ika-126 nga hugna sa U.S. Peace Corps Volunteers nga gipadala sa Pilipinas. Sila nag edad og 22 ngadto sa 26 anyos nga adunay tagsa tagsa ka mga skills kun kahanas. (BANAT NEWS)