Illegal drugs operation malamposon, kapolisan gipasidunggan
CEBU, Philippines — Gipasidunggan sa Police Regional Office 7 (PRO7) ang mga PNP personnel gumikan sa ilang kalamposan sa operasyon batok sa illegal nga drugas.
Gihatagan og PNP Heroism Medal (Medalya ng Kadakilaan) ang Regional Police Drug Enforcement Unit (RPDEU) gumikan sa ilang pagdakop sa usa ka high-value individual ug pagsakmit sa 5.9 ka kilo nga shabu nga nagkantidad og P40.7 milyon niadtong Hunyo 3, 2024, sa Brgy. Labangon, siyudad sa Sugbo.
Samtang ang mga sakop sa Police Station 6, Cebu City Police Office (CCPO), nakadawat og PNP Medal of Merit (Medalya ng Kagalingan) tungod sa ilang pagdakop sa usa ka high-profile personality ug pagsakmit sa 121.82 ka gramo nga shabu niadtong Abril 30, 2024, sa Brgy. Suba, Cebu City.
Sa iyang pakigpulong, gidayeg ni PRO-7 regional director PBGen Anthony Aberin ang Team PRO7 tungod sa ilang paningkamot sa pagpakigbatok sa ilegal nga drugas, sugal, ingon man krimen ug gidasig ang tanang kawani sa pagserbisyo sa katawhan uban ang kadasig ug positibo nga kinaiya.
Gihatagan usab niya og gibug-aton ang malinawon nga pagtapos sa SONA sa Presidente sa Central Visayas, nga walay mga gikatahong insidente.
Gawas niana, iyang gihimug-atan ang panginahanglan alang sa padayon nga pag-update sa mga plano sa pagpangandam sa katalagman aron masiguro ang epektibo nga pagtubag sa mga emergency.
Dugang pa, sa pagbukas sa klase, gipadayag ni PBGen Aberin ang kamahinungdanon sa pagkamabinantayon ug ang epektibong pag-umol sa mga security procedures aron mamintinar ang luwas ug hapsay nga palibot sa mga tunghaan. (BANAT NEWS)
- Latest
